О. Бектенов ӘМСҚ ны Қаржы министрлігінің басқаруына беруді тапсырды

Үкімет жеке медициналық ұйымдарды қаржыландыруда көптеген заң бұзушылықтарды анықтады. Қаржы министрі Мәди Такиев ауқымды аудит нәтижесін жариялады.

Өрескел бұзушылықтар қатарында қайтыс болған азаматтарға қызмет көрсету фактілері бар. Бір күнде клиника орта есеппен 24 адамға дейін қабылдай алатынына қарамастан, жекеменшік емхана бір күнде 1442 пациент қабылдаған. Талдау барысында қосарланған қаржыландырудың кең таралған екі жағдайы анықталды. Біріншісінде – жекеменшік медициналық ұйымдардың жұмыс беруші тарапынан ерікті медициналық сақтандыру бойынша және МӘМС қорының қаражаты есебінен бір мезгілде төлем алуы болса, екінші жағдайда – бір науқастың бір мезетте екі медициналық ұйымның базасында қатар тіркелуі.

Сондай-ақ медициналық ұйым басшыларының табыстары мен сатып алған мүліктеріне талдау жасалды. 2024-2025 жылдар аралығында 1 465 басшы 5 мыңнан астам жылжымайтын мүлік объектісін сатып алған. Енді барлық деректер құқық қорғау органдарына беріледі. Олжас Бектенов әлеуметтік медициналық сақтандыру қорын Қаржы министрлігінің басқаруына беруді тапсырды.

Мәди Такиев, ҚР Қаржы министрі:

- Жалған пациенттерді тіркеу, азаматтарға өздеріне тән емес медициналық қызметтерді көрсету. Медициналық қызмет көрсету датасына дейін қайтыс болған азаматтарға қызмет көрсету және төлем жасау фактілері тіркелді. Бұндай 996 пациентке қатысты 3 640 оқиға анықталды. Мысалы, 2023 жылы қайтқан адамды 2025 жылы қабылдауға жазған. Тағы бір жағдайда 6 ай бұрын қаза қайтыс болған балаларға стоматологиялық және лабораториялық қызмет көрсету жазбасы бар. 1,8 млрд теңгеге пациенттің жынысына сәйкес келмейтін скринингтердің 769 446 жағдайы тіркелді. Тек бір ғана Қарасай аудандық ауруханасында осындай 11 мыңнан астам жағдай анықталды.