Oi Qaragai тау курортын дамыту жобасы бойынша инвестициялық келісім мақұлданды

Мемлекет басшысының тапсырмалары аясында елімізде Алматы тау кластерін дамытуға бағытталған жүйелі шаралар жүзеге асырылып, заманауи туристік инфрақұрылымды қалыптастыру және өңірдің инвестициялық тартымдылығын арттыру жұмыстары жүргізілуде, – деп хабарлайды Aikyn.kz.

Қазақстан Республикасы Үкіметі Алматы облысындағы Oi-Qaragai тау курортын дамыту жөніндегі инвестициялық келісім жасасу туралы қаулыны бекітті. 

Аталған жоба жыл бойы қызмет көрсететін заманауи тау курортын салуды, тау шаңғы, туристік және сервистік инфрақұрылымды дамытуды көздейді. Технологиялық үдеріс нысандарды іске қосу және оларды одан әрі пайдалану кезеңдерін қамтиды. Сонымен қатар қауіпсіздік, экологиялық тұрақтылық және табиғи ресурстарды тиімді пайдалану талаптары ескерілген.

Қазіргі таңда тау шаңғы трассаларын жабдықтау бойынша Аустрияның мамандандырылған компаниясы бас мердігер ретінде айқындалды. Аспалы жол құрылысы аяқталуға жақын. Ақтас платосына апаратын автокөлік жолы салынды, тау шаңғысы бекеттері мен өзге де инфрақұрылым нысандары бойынша құрылыс-монтаж жұмыстары жүргізілуде.

Былтыр Oi-Qaragai тау курортын жылыту қазандығын газбен қамтамасыз ету мақсатында сыртқы газ құбырын салу жобасы аяқталды. Ұзындығы 5,9 шақырым болатын газ құбыры тартылып, нысан штаттық режимде жұмыс істеп тұр. Осылайша курорт жылумен және ыстық сумен үздіксіз қамтамасыз етіліп отыр.

Жобаны тиімді үйлестіріп іске асыру мақсатында инвестор, Алматы облысының әкімдігі және ҚР Туризм және спорт министрлігі арасында жол картасы бекітіліп, тиісті құжаттарға қол қойылды.

Oi-Qaragai жобасын жүзеге асыру өңірдің әлеуметтік-экономикалық дамуына оң ықпал етіп, жаңа жұмыс орындарын ашуға, туристік ағынды арттыруға, шағын және орта бизнесті дамытуға, салық түсімдерін көбейтуге, сондай-ақ халықаралық деңгейде бәсекеге қабілетті туристік өнім қалыптастыруға мүмкіндік береді.