Олимп , INVIVO сияқты компаниялардың порталдары мемлекеттік ақпарат жүйесімен интеграцияланады

Құжатты таныстырған Денсаулық сақтау министрінің бірінші орынбасары Тимур Сұлтанғазиев заң жобасы елдегі медициналық ақпарат жүйелерінің бәрін бір арнаға тоғыстыруға жол ашатынын айтты.

— Қолданыстағы заң аясында жеке меншік медициналық ұйымдардың ақпарат құралдары толығымен мемлекетті ақпарат жүйесімен интеграцияланады. Осы заң жобасының аясында түрлі жеке меншік ақпарат жүйелері, әсіресе, зертханалық порталдар, радиологиялық ақпарат жүйелерін мемлекеттік ақпарат жүйелерімен интеграциялау көзделіп отыр, — деді Сұлтанғазиев.

Айтуынша, бұл норма көрсетілген медициналық қызметтерге шынайы мониторинг жасауға көмектеседі.

— Өздеріңіз білесіздер, бізде «Олимп», INVIVO сияқты жеке меншік лабораториялық, диагностикалық ұйымдар бар. Қазір олардың жұмысын көре алмаймыз. Өзіңіз айтқандай науқасқа қажетті зерттеулер іс жүзінде шынымен жүргізілгеніне көз жеткізе алмаймыз. Осы заң аясында жеке меншік медициналық ақпарат жүйелерін мемлекеттік жүйелермен интеграциялануға міндеттейміз, — деді Тимур Сұлтанғазинов.

Бұған дейін 2026 жылы электронды денсаулық паспорттары толыққанды қолданысқа енетінін жазған едік.