Өнердің емдік қуаты

Өнердің адам ағзасына әсері жай ғана шабыт не эмоция тудырып қоюмен шектелмейтіні ғылыми түрде дәлелдене бастады. Лондондағы King’s College университетінің мамандары жүргізген жаңа зерттеу түпнұсқа суреттерді көру адамның биологиялық күйіне тікелей ықпал ететінін көрсетті, деп жазады Egemen.kz.

Ғалымдар 18 бен 40 жас аралығындағы еріктілерді екі топқа бөліп, олардың реакциясын салыстырған. Бірінші топ Мане, Ван Гог, Гоген, Тулуз-Лотрек тәрізді әлемдік шеберлердің түпнұсқа туындыларын галереяда тамашаласа, екінші топ дәл сол суреттердің көшірмелерін зертхана жағдайында қарады. Тәжірибе барысында қатысушылардың жүрек соғысы, дене температурасы және сілекей үлгілері арқылы стресс деңгейі мен иммундық белсенділігі бақылауға алынған.

Нәтижелер зерттеушілердің өздерін де таңғалдырды. Түпнұсқамен бетпе-бет келген адамдардың стресс гормоны – кортизол мөлшері орта есеппен 22 пайызға төмендеген. Ал көшірмелерді қарағандарда бұл көрсеткіш небәрі 8 пайызды құраған. Бұған қоса, қабыну процесіне қатысатын IL-6 және TNF-α секілді цитокиндер деңгейі 30 және 28 пайызға дейін азайғаны анықталды.

Зерттеу жетекшісі Тони Вудстың айтуынша, өнер адамның көңіл күйіне ғана емес, физиологиялық жүйелеріне де ықпал етеді: «Мәдени кеңістікте түпнұсқа өнер туындысын көру ақыл мен тәнді табиғи жолмен тыныштандырады. Бұл – ағзаны қорғаудың қолжетімді әрі қауіпсіз тәсілі», дейді ол.

Ғалымдар бұл деректер өнердің терапиялық маңызын жаңа қырынан ашып, жүрек-қан тамырлары сырқаты, депрессия сияқты аурулардың алдын алуда көмегі барын атап өтеді.

Art Fund ұйымы да зерттеу қорытындылары қоғамды музейлер мен галереяларға жиі баруға ынталандырады деген сенімде. Өйткені өнермен тікелей байланыс адамның денсаулығын жақсартатын қарапайым әрі тиімді әдіс болып отыр.