OpenAI басшысының үйін өртемекші болған адамға ауыр айып тағылды

АҚШ билігінің мәліметінше, күдікті Сэм Альтманның Сан-Францискодағы үйіне жанғыш қоспа құйылған бөтелке лақтырған. Оқиға салдарынан үйдің сыртқы қақпасы өртенген, алайда зардап шеккендер жоқ.

Тергеу барысында күдіктіден зорлық-зомбылыққа үндейтін материалдар мен жасанды интеллект салдарынан адамзаттың жойылып кетуі мүмкін екені туралы ескертулер жазылған құжаттар табылған. Құжаттардың бірінде «Біздің таяп келе жатқан жойылуымыз туралы тағы бірнеше сөз» деген атау болған. 

Күдіктіге кісі өлтіруге оқталудан бөлек, бірнеше ауыр қылмыс, соның ішінде қаруды заңсыз сақтау және жарылғыш заттарды пайдаланып мүлікке қасақана зиян келтіруге әрекет жасау айыптары тағылған. Егер кінәсі дәлелденсе, ол ұзақ мерзімге бас бостандығынан айырылуы мүмкін.

Прокурорлардың айтуынша, тергеу әлі бастапқы кезеңде. Сонымен бірге бұл әрекет кейін ішкі терроризм актісі ретінде де қайта саралануы мүмкін екені жоққа шығарылмайды.

Тергеу материалдарына сәйкес, күдікті OpenAI кеңсесін де өртеп жіберемін деп қорқытқан. Оның жанынан керосин, оттық және жасанды интеллект компаниялары басшылары мен инвесторларына қарсы бағытталған тізім табылған.

Соңғы уақытта OpenAI мен оның басшысы Сэм Альтман жасанды интеллектіні адамзатқа қауіп деп санайтын топтардың наразылық нысанына айналып отыр.

Айта кетейік, OpenAI басшысы жасанды интеллектіні реттейтін жаһандық орган құруға шақырды.