Орманды қалпына келтіру: Кіші Алматы шатқалында шыршылар отырғызылды

Курорт бастамасымен Кіші Алматы шатқалында тянь-шань шыршаларының орман алқабын сақтау мен қалпына келтіруге арналған жоба қолға алынды. Іс-шараға Іле Алатауы мемлекеттік ұлттық табиғи паркі, «Медеу» табиғи саябағы және өзге де ерекше қорғалатын табиғи аумақтардың өкілдері, сондай-ақ экологтар мен қоғам қайраткерлері қатысты.

— 2011 жылы болған қатты дауыл тауларымыздың экожүйесі мен табиғи келбетіне айтарлықтай зиян келтірді. 80 мыңнан астам ағаш құлап, оның орнын толтыру жұмыстары әлі күнге дейін толық аяқталған жоқ. Біз табиғи тепе-теңдікті қалпына келтіруге өз үлесімізді қосқымыз келеді және бүгін бұл істі курорты аумағынан бастадық. Ал алдағы жылдары жоба Кіші Алматы шатқалының басқа да аймақтарын қамтитын болады, — деді «Шымбұлақтың» бас директоры Ринат Абрахманов.

Ал Іле Алатауы ұлттық табиғи паркінің бас директоры Елнұр Ахметов биыл экологиялық бастама аясында бір гектар аумақта 500 тянь-шань шыршасының көшеті отырғызылатынын атап өтті.

«Шыршалы» жобасының жетекшісі Махамбет Абдуллаевтың айтуынша, тянь-шань шыршасы — ерекше ағаш. Ол 40 метрден астам биіктікке жетіп, 300 жылға дейін өмір сүре алады. Алайда жылына орта есеппен 10–15 сантиметр ғана өседі.

— Біз табиғатты қорғау, экологиялық ағарту және ғылыми зерттеу бағыттарында үлкен жұмыс атқарып жүрген Іле Алатауы ұлттық паркімен тығыз ынтымақтастықта жұмыс істейміз. Парк мамандарымен бірге отырғызуға лайық аймақтарды зерттеп, алдағы іс-қимыл жоспарын келістік, — деді ол.

Еске салайық, 2011 жылы қатты дауылдан Іле Алатауы мемлекеттік ұлттық табиғи паркі мен «Медеу» мемлекеттік өңірлік табиғи паркінде жалпы көлемі 480 гектар орман ағаштары құлаған. Дауыл мен желдің салдарынан келген залал 130 млн теңгеден асты.

Іле Алатауында дауылдан зақымданған орман учаскелеріндегі ағаш отырғызу жұмыстары 2012-2015 жылдары аралығында жүрді.