Ормуз бұғазында АҚШ блокадасына қарамастан кеме қатынасы жалғасып жатыр

Reuters және салалық дереккөздердің мәліметінше, шектеулер енгізілген алғашқы тәулікте кемінде 8 кеме, оның ішінде Иранмен байланысты 3 танкер бұғаздан өткен. Олардың бір бөлігі ирандық емес порттарға бағыт алған және блокада талаптарына ілікпеген.

Сонымен қатар, жалпы трафик көлемі айтарлықтай төмендеген. Бұған дейін бұғаз арқылы тәулігіне 130-дан астам кеме өтсе, қазіргі көрсеткіш одан әлдеқайда аз.

АҚШ санкцияларына іліккен кейбір кемелер де қозғалысын жалғастырып жатыр. Иранның Fars агенттігінің хабарлауынша, 2 млн баррельге дейін мұнай тасымалдай алатын супертанкер бұғаздан өтіп, Имам Хомейни портына бағыт алған. Кеме ашық түрде, маршрутты жасырмай және навигациялық жүйесін өшірмей жүргені атап өтілді.

АҚШ тарапы блокаданың орындалуын қамтамасыз етіп жатқанын мәлімдеді. The Wall Street Journal басылымына сілтеме жасаған америкалық шенеуніктердің айтуынша, операция басталғалы бері Иранмен байланысты кемінде 8 танкер бағытын өзгертіп, Иран порттарына қайтарылған.

Басылым мәліметінше, блокаданы жүзеге асыруға 15-тен астам әскери кеме мен мыңдаған америкалық әскери қызметкер тартылған. Олардың қатарында теңіз жаяу әскерлері мен арнайы операция күштері бар.

Associated Press дерегінше, АҚШ стратегиясы – Иран порттарынан шыққан кемелерді бақылап, кейін Оман шығанағында тоқтатып, кері бұру. Бұл ретте автоматты сәйкестендіру жүйелерімен қатар өзге де бақылау құралдары қолданылады.

Сарапшылар соңғы күндері бақылаудан жалтару әрекеттері артқанын айтады. Кейбір кемелер транспондерлерін өшіріп немесе жалған сигналдар қолдана бастаған.

АҚШ Орталық қолбасшылығы блокада толық іске асырылғанын және Иранның теңіз саудасына елеулі әсер еткенін мәлімдеді.

Ал Иран тарапы блокаданың тиімділігін жоққа шығарып отыр. Ресми өкілдер елдің Парсы шығанағы, Оман теңізі және Ормуз бұғазындағы кеме қатынасының қауіпсіздігін қамтамасыз ете алатынын жеткізді.

Аймақтағы жағдай аясында кеме қатынасы компаниялары мен сақтандыру нарығында белгісіздік сақталып отыр. Әскери тәуекелдерді сақтандыру құны жоғары деңгейде қалып, сарапшылар қалыпты режимге оралу жақын арада мүмкін емес екенін айтады.

Еске сала кетейік, АҚШ осы аптаның басында Иран порттарына қатысты әскери-теңіз блокадасын бастаған еді. Сонымен қатар Иран мен АҚШ арасындағы келіссөздердің келесі кезеңі осы апта соңына дейін өтуі мүмкін екені хабарланған.