Өскеменде коммуналдық мекеме қызметкерлері жұмыс уақытынан тыс еңбегіне ақы алады

Өскеменде коммуналдық кәсіпорын қызметкерлері енді жұмыс уақытынан тыс атқарған еңбегі үшін қосымша ақы алады.

Сонымен қатар қар тазартатын арнайы техниканы жалға алуға қосымша қаражат бөлінбек. Облыс орталығында екі тәуліктің ішінде қардың айлық нормасы жауды. Қала көшелері мен аулалары қалың қардың астында қалып, оны тазарту бірнеше күнге созылды. Бұған қоса аула сыпырушылар мен механизаторлардың штаттық құрамы толық емес. Бар болғаны 217 жұмысшы тәулік бойы, демалыссыз қар тазартты.

Берік Мұқашев екі әріптесімен бірге қаланың орталық даңғылын қардан қолмен тазартып жүр. Ауыр күрекпен жұмыс істеп жүргендер қатарында қыздар да бар.

Берік Мұқашев, коммуналдық кәсіпорын жұмысшысы:

- Халыққа тазалық болсын дейміз. Бәрі енді жақсы, жаман деп айта алмаймын жұмысымыз. Істейміз. Күнделікті жұмысымыз осы міне. 

Коммуналдық қызметкерлер бір-бірлеп немесе шағын топ болып бүкіл қаланы қардан аршуға мәжбүр, кадр тапшылығы салдарынан көп жағдайда бір адам үш адамның жұмысын атқарып жүр. Қазір қаладағы коммуналдық кәсіпорындарға 70-тен астам жұмысшы жетіспейді.

Рашид Шерубаев, ТҮКШ, жолаушылар көлігі және автожолдар бөлімі басшысының орынбасары:

- Қалада бір жарым айлық қар нормасы жауды. Сондықтан арнайы техниканы тоқтата алмадық. Олардың жұмыс кестесі әдетте кешкі 5–6-ға дейін, бірақ біз оларды түнгі уақытта да жұмысқа шығуға мәжбүр болдық.

218 жұмысшы 540 шақырым аумақты тазалайды. Орта есеппен әр қызметкерге 250 гектар жерден бөлінеді. Еңбек жағдайларының ауырлығын ескеріп, жергілікті билік өкілдері тазалықшыларға артық жұмыс уақыты үшін қосымша төлем енгізіп отыр.

Александр Светаш, қалалық мәслихат төрағасы:

- Автослесарьлар мен жүргізушілердің еңбекақысын арттыруға қосымша қаражат бөлінген. Сонымен қатар Өскемен қаласының аумақтық басқару орталықтарына да қар тазартатын арнайы техниканы жалға алуға қаржы қарастырылды. Олар қар қалың жауған кезеңде әлеуметтік нысандарға кіреберіс жолдарды тазартумен айналысады. 

Жыл соңына дейін аумақтық басқару орталықтары 50 миллион теңгеден астам мемлекеттік дотация алмақ. Бұл қаражат коммерциялық қар тазартатын техниканы жалға алуға бағытталады. Себебі коммуналдық қызмет паркінде тракторлар мен грейдерлер жеткіліксіз. Қыста бар болғаны 67 арнайы техника қызмет көрсетеді.

Рүстем Қайратұлы, Вячеслав Ветлугин, Дмитрий Пыхтин