Отандық тас өңдеу саласында сұраныстың 90% дан астамы қамтамасыз етілген Сауда министрлігі

Баспасөз қызметінің мәліметтеріне қарағанда, негізгі кезеңдердің бірі – СТ РК 3619 «Табиғи тастан жасалған бұйымдар. Жалпы техникалық шарттар» ұлттық стандартының қабылдануы болды. Бұл стандарт салалық қауымдастықтың, оның ішінде «QAZAQ STONE» Қазақстан тас өңдеу саласы одағы ЗТБ-ның белсенді қатысуымен әзірленді.

Стандарт табиғи тастан жасалған бұйымдардың сапасы мен қауіпсіздігіне бірыңғай талаптарды белгіледі, сондай-ақ өнімді кен орындарының шикізат базасымен салыстыруды қоса алғанда, сәйкестікті растау рәсімдерін бекітті.
Техникалық реттеуді одан әрі дамыту стандарт талаптарын «Ғимараттар мен құрылыстардың, құрылыс материалдары мен бұйымдарының қауіпсіздігі туралы» Қазақстан Республикасының техникалық регламентіне (2023 жылғы 9 маусымдағы № 435 бұйрық) енгізу арқылы қамтамасыз етілді. Бұл стандарт ережелерін міндетті деңгейде бекітуге мүмкіндік беріп, бүкіл ел бойынша талаптардың біркелкі сақталуын қамтамасыз етті. Нәтижесінде нарық анағұрлым ашық әрі түсінікті болды, сәйкестікті бағалау жүйесіне деген сенім артты және өнім сапасы жақсарды.

Ресми статистика деректеріне сәйкес, табиғи тастан жасалған кеспекше (брусчатка), бордюр тастары және төсем плиталарын отандық өндіру ішкі нарық қажеттілігінің 91%-ына дейін қамтамасыз етеді. Сонымен қатар, қабылданған шаралар өндіріс қуатының жүктемесін едәуір арттырып, өнім шығару көлемін ұлғайтуға мүмкіндік берді. Атап айтқанда, 2025 жылдың қорытындысы бойынша гранит бордюрі мен төсем плиталарын өндіру 30%-ға өсті.

-Біздің сала табиғи тастан жасалған бұйымдарды өндіру мен өңдеуді қамтиды және қазіргі уақытта қарқынды дамып келеді. Ұлттық стандартты енгізудің арқасында, әсіресе гранит бордюрлері мен брусчатка өндірісі ұлғайып, импорттан іс жүзінде толық бас тартуға мүмкіндік туды. Сондай-ақ стандарттарды әзірлеу нарықтан сапасыз құрылыс материалдарын шығаруға ықпал етті. Техникалық реттеу – отандық өндірушілерді дамытудың негізгі құралы, – деп атап өтті Қазақстан тас өңдеу саласы одағы басқарма төрағасы Даурен Ағзымов.

Отандық өнімдер ұлттық және халықаралық талаптарға сәйкес келеді, бұл саланың экспорттық мүмкіндіктерін кеңейтеді. Қазақстанда өндірілген табиғи тас бұйымдары ірі инфрақұрылымдық жобаларда қолданылып, шетелге экспортталып жатыр.

Осыған дейін Қазақстанда цифрлық қауіпсіздікті күшейтетін жаңа ұлттық стандарттар бекітілгені туралы жаздық.