“Өзіңізбен бірге ала келіңіз“. Түркия мен Еуропа қонақ үйлері танымал заттан бас тартады

Антальяның ірі қонақүйлері мен еуропалық курорттарда "кәдесый" сусабындар дәуірі аяқталып келеді. Туристер естелік ретінде өздерімен бірге алып кетуді ұнататын бір реттік шағын құтылар енді өткенде қалмақ, деп хабарлайды Tengri Travel

Антальяның ірі қонақүйлері мен еуропалық курорттарда "кәдесый" сусабындар дәуірі аяқталып келеді. Туристер естелік ретінде өздерімен бірге алып кетуді ұнататын бір реттік шағын құтылар енді өткенде қалмақ, деп хабарлайды Tengri Travel

Түркияда не өзгерді?

Alanya Postasi мәліметінше, түрік отельерлері пластик қалдықтарын азайту мәселесіне байыппен кірісуді ұйғарған. Жуынатын бөлмелердегі шашылып жататын кішкентай құтылардың орнына енді стационарлық дозаторлар жиірек орнатыла бастаған.

Бұл не үшін қажет?

Басты себеп - экология. Билік пен отельерлер бір реттік қаптамалардан бас тарту миллиондаған пластик қалдықтарын азайтуға көмектеседі деп үміттеніп отыр.

Бұған қоса, бұл қонақүйлерге гигиеналық құралдарды сатып алу мен логистика шығындарын азайтуға мүмкіндік береді.

Мұндай жүйені қазірдің өзінде келесі халықаралық желілер сынақтан өткізіп жатыр:

Hilton; Marriott International; Accor.

Алдын ала пікірлерге қарағанда, бұл жаңашылдық әзірге қонақтар тарапынан айтарлықтай наразылық тудыра қойған жоқ.

Туристер үшін нені білдіреді?

Бұл жаңашылдық туристер үшін екі қолайсыздық тудырады. Біріншіден, енді үйге алып кету мүмкін болмайды - дозаторлар қабырғаға берік бекітілген.

Екіншіден, егер сіз "ортақ" сабынның сапасына сенбесеңіз, барлық керек-жарақты өзіңізбен бірге тасуға тура келеді. Бұл дегеніміз - чемодандағы артық салмақ және қол жүгіндегі сұйықтық көлеміне қойылатын қатаң бақылау.

Еуропада не өзгереді?

Euro Weekly News мәліметінше, шағын қаптамалардан бас тарту идеясы бастапқыда Еуропа Одағы елдерінде белсенді талқыланған. Сонымен қатар, бұл өзгерістер тек қонақүйлерге ғана емес, қоғамдық тамақтандыру саласына да әсер етеді: соустардың жеке порциялары мен дәмдеуіш пакеттерін көп реттік нұсқалармен алмастыру жоспарланып отыр.

"Микропластиктен" бас тартуды кезең-кезеңімен енгізу процесі 12 тамызда басталады, ал толық көшу 2030 жылға қарай күтіледі.

Қонақүйлердегі көп реттік сусабындар несімен қауіпті

Экология - жақсы, бірақ дәрігерлердің гигиенаға қатысты сауалдары бар. Танымал блогер әрі саяхат бойынша сарапшы Лори Грейнер алаңдатарлық зерттеулерді еске салды: қонақүйлердегі 4 дозатордың 3-і бактерия ошағы болуы мүмкін.

"Газета.ру" мәліметінше, эпидемиолог Алекс Сандерманн 20 қонақүйде тексеру жүргізіп, көп рет қолданылатын контейнерлердің 70 пайызы ластанғанын анықтаған. Қызметкерлер ескі, шала жуылған ыдыстарға жаңа сабын құйған кезде, оның ішінде микробтардың көбеюіне қолайлы орта қалыптасады.

Саяхатшыларға қандай кеңес беріледі

Егер теріңіз сезімтал болса немесе гигиена мәселесіне ұқыпты қарасаңыз, алдын ала бос құтылардан тұратын жол жиынтығын сатып алып, оларды үйден тексерілген құралдармен толтырып алған абзал. Жағымсыз тосынсыйларды болдырмау үшін сапар алдында мыналарды ескерген жөн:

қонақүйдің не ұсынатынын алдын ала тексеру; қол жүгіндегі сұйықтықтарға қойылатын шектеулерді ескеру.

Google News арқылы жаңалықтарымызды қадағалаңыз

Жазылу