Павлодар облысында аяз түскелі 24 адамды үсік шалды

Биыл теріскейде қыс қатты болып тұр. Павлодар облысында күшейтілген режим енгізілді. Аяз түскелі өңірде 24 адамды үсік шалған. 16 адамға ампутация жасалды. Соңғы бірнеше күнде екі бала үсік белгісімен ауруханаға жатқызылды.  Мектеп оқушылары онлайн форматқа көшті. Полицейлер тұрғылықты мекенжайы жоқ адамдарды анықтап, арнайы орынға жеткізіп жатыр.  

Қарлығаш Қасиетова, тілші:

- Алғашқы үсік шалғандар қазан айының ортасында дәрігердің көмегіне жүгіне бастаған. Сол кезде қалың қар жауып, ауа температурасы -15 градусқа дейін төмендеп кетті. Қазір өңірде қыс қаһарына мінгендей. Бет қаритын аязда далада ұзақ тұру мүмкін емес. Әдетте тілшілер эфирге бас киімсіз шығатын. Алайда дәл осындай аязда тәуекел ете алмадық. Дәрігерлер де қалың киініп жүруді ескертіп жатыр. 

Асхат Мұрсалимов, №1 Қалалық ауруханасының күйік бөлімшесінің меңгерушісі:

- Бір адам емханадан шыққаннан кейін аялдамада өзін жайсыз сезініп, есінен танып қалған. Оны қанша уақыттан кейін байқағаны және жедел жәрдемнің қашан шақырылғаны белгісіз, алайда клиникалық мәліметтерге сәйкес ол кем дегенде жарты сағаттай суықта жатқан. Нәтижесінде екі қолының да саусақтары үсіп қалған. Науқас қазір жансақтау бөлімінде жатыр.

Аяз күндері ішімдік ішіп, салдарынан қол-аяғын үсіріп алғандар да бар. Асхат Мұрсалимовтың айтуынша, адамдар дер кезінде дәрігерге жүгінбей, уақытын өткізіп алады. Бұл салғырттықтың соңы ампутациямен аяқталады. «Көп адам үсік шалған кезде қалай әрекет ету керегін білмейді», - дейді мамандар. 

Асхат Мұрсалимов, №1 Қалалық ауруханасының күйік бөлімшесінің меңгерушісі:

- Ең дұрыс шешім – құрғақ заттармен жылыту. Яғни аяқ-қолды құрғақ шәлі немесе сүлгімен орап қою керек. Осылайша аяқ-қол біртіндеп жылынады. Бұл – жақын маңда медициналық пункттер болмаған жағдайда жасалатын алғашқы әрекет. Ал егер мүмкіндік болса, науқасты бірден медициналық мекемеге жеткізу қажет. Себебі емдеу мекемелерінде біз тамырлық терапияны бастап, қан айналымын мүмкіндігінше қалпына келтіре аламыз. Сонда тіндердің зақымдануы барынша аз болады.

Соңғы екі тәулікте облыстық балалар ауруханасына үсік белгілерімен екі бала жеткізілді. Олардың бірі травматология бөлімшесіне жатқызылса, екіншісі толық тексеруден кейін амбулаториялық ем алуға жіберілді. Ал полиция қызметкерлері жүргізген рейд барысында жылу трассаларын паналап жүрген 150-ге жуық адам арнайы орынға орналастырылды. 

Асылбек Хаербаев, қалалық ПБ Қабылдау-тарату мекемесі басшысының орынбасары:

- Қабылдау-тарату бөлімшесінің рейдтік тобы күшейтілген қызмет түріне көшті. Адамдардың қатты аязда далада қалуы үсікке ғана емес, өлімге де әкелуі мүмкін. Осыған байланысты біз тұрғылықты мекенжайы жоқ адамдарды тауып, бейімдеу орталығына жеткізіп жатырмыз. Соңғы күндері 147 адамды қабылдадық .

Қабылдау барысында кезбелердің жеке басын анықтау шаралары жүргізіледі. Суретке түсіріп, саусақ іздерін алады. Бұл деректер іздеуде жүрген қылмыскерлер мен хабар-ошарсыз кеткен адамдарды табу үшін қажет. Синоптиктердің болжамынша, алдағы үш күнде ауа температурасы 37 градусқа дейін төмендейді. Қатты аязға байланысты облыс аумағында күшейтілген режим енгізілді.

Авторлары: Қарлығаш Қасиетова, Дәулет Қошқарбаев, Марат Игіліков