Павлодар облысында мұз құрсауынан құтқарылған аққулар айдынына оралды

Қос аққудың оқиғасы қыста басталған болатын. Құстардың бірі мұзға жабысып қалып, сыңары оны тастамай жанында жүрген жерінен ауыл тұрғыны Бауыржан Жақыпов тауып алған. Бауыржан Жақыпов аққуларды өз үйіне әкеліп, олардың қыстап шығуына бар жағдайды жасады.

Волонтердің айтуынша, құстарды бағу барысында қиындықтар да болған. Алайда халықтың аманатын арқалаған Бауыржан құстарды көктемге дейін аялап бақты. Ол аққуларға «Мәңгілік махаббат» деген есім берді.

Құтқарушы Бауыржан Жақыповтың айтуынша, құстардың қазіргі жағдайы тұрақты.

– Қыс бойы аққулар 4 жарым ай бойы өзімде болды. Оларға бидай, арпа беріліп, кәдімгі үйдегі қаздар мен үйректер сияқты күтім жасалды. Аққуларды ең бірінші сәтте қыс бойы уайымдадық. Кейде ас жемей қалған немесе ағаштардың арасында қыстырылып қалған күндері болды. Соның бәрін уайымдап, қаншама халықтың аманатын арқалаған соң, адамдар күтіп отырған соң, көктемде ұшырады деген соң сол барлығын жеңіп шықтық деп ойлаймын, – дейді ол.

Бауыржан Жақыпов аққуларды туған жері Сұлусор көліне ұшыруды армандаған. Жақында бұл тілегі орындалып, құстар өз мекеніне қанат қақты. Волонтер құстарды жібергенімен, олардың жағдайын бақылап тұратынын айтады.

– Аман-есен ұшырдым. Кез келген адамда қимастық болады, менде де қимастық бар. Екі-үш күн бұрын барып қарадым, олар өз мекенінде жүр, ешқайда кеткен жоқ. Жаз бойы олар сол көл бетінде қоректеніп жүреді. Қыс бойы бірге уақыт өткізген соң, жақындасам танимын, – деп түйіндеді Бауыржан Жақыпов.

Айта кетейік, аққуларды құтқару ісіне жергілікті тұрғындар мен жануарларды қорғау орталығының мамандары да атсалысқан.

Бұған дейін, Павлодар өңіріне аққулар ұшып келе бастағанын жазған едік.