Павлодарда жылыту маусымына дайындық пен ұлттық жобаның орындалуы талқыланды

Отырыс барысында ЭКСЖ ұлттық жобасын іске асырудың қазіргі кездегі  қарқыны, конкурстық рәсімдердің барысы, жобаларды қаржыландыру мәселелері және өңірлердің жөндеу науқанын өткізуге дайындығы қаралды.

Биыл еліміздің тұрғын үй-коммуналдық шаруашылығы саласына шамамен 1,3 трлн теңге инвестиция тартылды. Оның 767 млрд теңгесі ЭКСЖ ұлттық жобасы аясында бағытталды. Бұл жалпы құны 164,8 млрд теңге болатын 37 пилоттық жобаны іске асыруға кірісуге мүмкіндік берді.

459 млрд теңгенің 242 жобасы конкурстық рәсімдер сатысында тұр. 175 нысан бойынша мердігерлік ұйымдар анықталды. Қаржыландыру халықаралық қаржы ұйымдарының, екінші деңгейдегі банктердің қаражаты, «Бәйтерек» холдингінің құралдары, сондай-ақ сыйақы мөлшерлемелерін субсидиялауды қоса алғанда, мемлекеттік қолдау шаралары есебінен қамтамасыз етіледі.

Ұлттық жобаны іске асыруға өңірлердің тартылу рейтингіне ерекше назар аударылды. Мониторинг деректері бойынша, бірқатар өңірлер конкурстық рәсімдерді өткізу және шарттар жасасу бойынша артта қалуда. Ең төмен көрсеткіштер Алматы және Шымкент қалаларында, сондай-ақ Түркістан облысы мен Ұлытау облысында тіркелді.

Қанат Бозымбаев барлық қажетті қаржыландыру тетіктері мен мемлекеттік қолдау шаралары қабылданғанын, ал өңірлердің басты міндеті құрылыс-монтаждау жұмыстарын уақтылы бастау және жобаларды сапалы іске асыру болып қала беретінін атап өтті.

Сонымен қатар, Павлодар облысы ЭКСЖ ұлттық жобасын іске асыру бойынша неғұрлым белсенді өңірлердің бірі ретінде атап өтілді. Өңірде соңғы 30 жылда алғаш рет инженерлік инфрақұрылымның тозуын тоқтатуға қол жеткізілді.

2025-2027 жылдары мұнда жалпы құны 131,6 млрд теңге болатын 55 жобаны іске асыру жоспарланған. Қазіргі уақытта жалпы ұзындығы 92,4 км болатын жылу және электрмен жабдықтаудың 16 объектісінде құрылыс-монтаждау жұмыстары жүргізілуде. Іске асырылып жатқан жобалардың құны 21,7 млрд теңгені құрайды.

Бұған қоса, Павлодар облысы 2027 жылға арналған жобалар саны бойынша республикада екінші орынға шықты. Олар жалпы құны 109,9 миллиард теңге болатын 39 жобаны қамтитын үлкен өтінім базасын дайындады. Бұл ретте іске асырылып жатқан жобалардағы қазақстандық өнімдер мен мамандардың үлесі (отандық мазмұн) 100%-ды құрап отыр.

«Ұлттық жобаны іске асыру үшін барлық қажетті шешімдер мен қаржыландыру тетіктері мемлекет тарапынан қабылданды. Бүгінде өңірлердің негізгі міндеті – жұмысты сапалы үйлестіруді қамтамасыз ету, конкурстық рәсімдерді уақтылы өткізу және құрылыс-монтаждау жұмыстарына кірісу. Павлодар облысының тәжірибесі көрсетіп отырғандай, жинақталған инфрақұрылымдық проблемалардың басым бөлігін жүйелі түрде және белгіленген мерзімде шешуге болады», деді Қанат Бозымбаев.

Жиынға қатысушылар отандық өнімнің үлесін арттыру мәселесін бөлек талқылады. Олар Ұлттық жоба аясында қазақстандық тауарлар мен қызметтерді көбірек пайдалану, сондай-ақ коммуналдық жүйелерді жаңарту жұмыстарына отандық өндірушілерді белсенді тарту жолдарын қарастырды.

Отырыс қорытындысы бойынша Қанат Бозумбаев жұмысы кешігіп жатқан жобаларды тез арада ретке келтіруді және барлық конкурстарды қысқа мерзімде аяқтауды тапсырды.

Сондай-ақ бұл жобаға қазақстандық өндірушілерді тарту бойынша нақты міндеттер жүктелді. Өнеркәсіп және құрылыс министрлігіне 1 шілдеге дейін отандық тауар өндірушілердің тізілімін (ҚТӨ тізілімі) жаңарту және Электрондық платформаның толыққанды жұмыс істеуіне кедергі болып тұрған кемшіліктерді жою тапсырылды.

Қанат Бозымбаев: 2029 жылға қарай коммуналдық желілердің тозу деңгейі 50%-дан аспауы керек

Тауарларды Электрондық платформадан тыс және Ұлттық жобаның бекітілген ережелерін айналып өтіп сатып алуға мүлдем болмайтыны ерекше ескертілді. Жауапты мемлекеттік органдарға Жобалық кеңсенің келесі жиынына дейін барлық тапсырмалардың орындалуын қамтамасыз ету жүктелді. Орындалмай қалған әрбір тапсырма бойынша мемлекеттік органдар мен жобаға қатысушылардың жұмысы қаншалықты тиімді екеніне жеке баға беріледі.