Петропавл тұрғыны 350 саз аспабын жинаған

Петропавл қаласының тұрғыны Виталий Жуков 350-ге жуық музыкалық аспап жинады. Қазір оның қолында бірнеше елдің музыкалық құралы бар. Коллекционер оларды жинап қана қоймай, түрлі аспапта шебер ойнайды. 

Бұл армян халқының «Дудук» деп аталатын үрмелі аспабы. Виталий Жуковтың коллекциясында одан бөлек қазақ, қытай, орыс, ирландықтар музыкалық құралдары бар. Ішекті, ұрмалы және үрмелі аспаптардың жалпы саны 350-ге жуықтайды. 

Виталий Жуков, коллекционер:

- Басында қызығып біреуін, кейін екіншісін алдым. Кейбіреуін мен жайлы естіген танымайтын адамдар сыйға тартты. Мысалы, бір жігіт әжесінің ескі үйінен табылған төрт көне аспапты әкеліп берді.

Коллекционер әнге кішкентай кезінен құмар болып өсті. Алты жасында қолына гитара алған ол қазір бірнеше халықтың ұлттық аспабында ойнайды. Оның қолында Африка, Оңтүстік Америка елдерінің де музыкалық құралдары бар. Өнерпаздың бұл қырын анасы да қолдайды. 

Наталья Жукова, қала тұрғыны:

- Ол музыкалық аспаптарға бала кезінен әуес болды. Біз де оны барынша қолдауға тырыстық. Қазір Виталий осы өнерге балалаларды баулып, ән-күй пәнінен сабақ береді. Мен ұлымды мақтан тұтамын.

Виталий Жуков - сегіз қырлы, бір сырлы өнерпаз. Ол музыкадан бөлек сурет салғанды ұнатады. Коллекционер музыкалық аспаптарға қызығушылық танытқан адамдарға шеберлік сағатын өткізіп, шағын концерттер де ұйымдастырады. 

Авторлары: Айдарбек Айтмұхамбетұлы, Қуаныш Қазбеков