Қала басшысы Instagram мен TikTok ты балаларға зиянды деп сотқа берді

Axios таратқан хабарламаға сүйенген Aikyn.kz жастардың психикасына зиянды әлеуметтік желілерді сотқа берудің себептерін түсіндіреді.

Бостон қаласы жастардың психикалық денсаулығына зиян келтірді деген айыппен әлеуметтік желілерге қарсы сот ісін бастады. Федералдық талап-арыз Бостон мемлекеттік мектептерінің атынан берілген. Онда Meta, Snap және ByteDance компания немқұрайлылық танытып, 46 мыңнан астам оқушыға әсер ететін қоғамдық қауіп қалыптастырды деп айыпталған. Бұл іске дейін АҚШ-та 1500-ден астам мектеп округі әлеуметтік желілердің кәмелетке толмағандарға зиянды ықпалына байланысты технологиялық компанияларды сотқа берген.

Бостон мэрі Мишель Вудың кеңсесі қаладағы жасөспірімдердің психикалық ахуалының айтарлықтай нашарлағанын айтады. Ресми деректерге сәйкес, 2021 жылы Бостон мемлекеттік мектептеріндегі жоғары сынып оқушыларының 44%-ы ұзақ уақыт бойы көңілсіздік пен жабырқау сезімінде болған. Ал 2015 жылы бұл көрсеткіш 27% ғана болған.

Қала басшылығы бұл өзгерісті тек әлеуметтік желілермен тікелей байланыстырып отырған жоқ. Дегенмен платформалардың үздіксіз айналдыру алгоритмдері, автоматты ұсыныстары сияқты қызметтері балалардың эмоциялық жағдайын нашарлатуы мүмкін деп есептейді.

«Бүгін біз әлеуметтік желі компаниялары қанаушылық сипаттағы тәжірибелерін тоқтатып, балаларды қорғаудың қарапайым талаптарын орындауға жауапты болуы тиіс екенін анық мәлімдейміз», – дейді Мишель Ву.

Бостонның талап-арызы Калифорнияның Солтүстік округтік сотына берілді. Ол әлеуметтік желі компанияларына қарсы өзге мектеп округтері қозғаған істермен біріктіріледі деп күтілуде.Meta өзіне тағылған айыптарды жоққа шығарды. Компания өкілінің айтуынша, олар он жылдан астам уақыт бойы ата-аналардың пікірін тыңдап, сарапшылармен және құқық қорғау органдарымен ынтымақтасып келеді.

«Біз қол жеткізген нәтижелерімізді мақтан тұтамыз және қауіпсіздікті одан әрі жетілдіру бағытында тұрақты жұмыс істейміз», – дейді компания өкілі.

Соған қарамастан, Meta мен басқа платформаларға қысым күшейіп келеді. Наурызда Калифорниядағы алқабилер соты Meta мен Google-ды жас әйелдің депрессиясы мен мазасыздығын ушықтыруға жауапты деп таныған. TikTok пен Snapchat та олардың алгоритмдері мен пайдаланушыны экранда ұзақ ұстайтын функциялары үшін сынға ұшырап отыр.

Бостон басшылығы сот ісінің негізгі мақсаты әлеуметтік желілерді шектеу емес, компанияларды кәмелетке толмағандарға арналған нақты қорғаныс тетіктерін өздері енгізуге мәжбүрлеу екенін айтуда.