Қарағандыда ерекше жандардың арбасын тегін жөндеуге болады

Қарағандылық ерекше жандар енді арбасын жөндететін жер іздеп әуреге түспейді. Қалада тегін техникалық қызмет көрсету орталығы іске қосылған. Мұндағы мамандар ақауды тез анықтап, жөндеп береді, ал егер жұмыс ұзаққа созылса, уақытша арба ұсынылады. Орталықта жұмыс істеп жүрген шеберлердің басым дені ерекше жандар.

Жаңа қызмет түрі – ерекше жандар үшін үлкен қолдау. Шеберханада 12 адам еңбек етеді. Соның сегізі мүгедектігі бар жандар. Сергей Харченко да басқа әріптестері сияқты арба жөндеудің нағыз шебері болып алған.

Сергей Харченко, шебер:

- Өзім де арбада отырғандықтан, оған деген тәуелділікті жақсы түсінемін. Қозғалыс техникасы болғандықтан, кейде бірдеңесі сынып жатады. Дөңгелегі, тіреуіштері, тежегіш істен шығады. Біздің орталыққа келетіндер өте көп. Оларға сапалы әрі жылдам қызмет көрсетуге тырысамыз.

Орталықта жылына 300-ге дейін арба жөнделеді. Мамандар ақауларды мұқият анықтап, жедел қалпына келтіреді. Жөндеуден бөлек мұнда химиялық тазалау жасатып, жаңа бөстек тіктіруге болады. Сондай-ақ арбаға дұрыс күтім жасау жолдары да түсіндіріледі.

Тігін цехының шебері Ирина Шпенглер өз ісінің нағыз маманы. Ол әр келген адамға ерекше көңіл бөліп, арбасын сәндеп береді.

Ирина Шпенглер, тігінші:

- Мен іс тіккенде барынша қиялым мен өнерімді салуға тырысамын. Біз сәнді киінгенді жақсы көреміз. Ерекше жандар үшін арба – ең қажетті зат. Сондықтан оларды қуантайын деп арбасын сәндеп беруге тырысамын. Кейбір адамдар өзінің қалағанын тігіп беруді сұрайды. Олардың да көңілін қалдырмаймын.

Техникалық қызмет көрсету орталығы мемлекеттік әлеуметтік тапсырыс аясында жұмыс істейді. Биыл орталыққа 20 млн теңге бөлінді. Бұл ақшаға мүгедектігі бар жандардың арбалары тегін жөнделді. Жалпы Қарағанды облысында арбаға таңылған 2,5 мыңнан астам адам бар.

Авторлары: Руслан Нұрланұлы, Аман Хамит