Қаратал ауданында 36 ғимарат салынды

Жетісу облысының Қаратал ауданында кейінгі үш жылда 36 ғимарат салынды. Мектеп, емдеу мекемесі және спорт кешені сынды тағы 30-дан астам нысан күрделі жөндеуден өтті. 

Әлеуметтік нысандардың жаңартылуымен аймақтағы ауылдардың да ажары айшықтала түсті.  

Қаратал ауданындағы көз тартатын көрікті ауылдардың бірі – Кәлпе. Кейінгі үш жылда елді мекенде бірнеше мемлекеттік мекеме салынды. Соның бірі – мәдениет үйі. Ғимарат бүгінде жергілікті тұрғындардың жиі басқосатын әрі көпшілік шараларды өткізетін руханият ордасына айналған.  

Галина Тілеуқызы, ауыл тұрғыны:

- Бұрын мәдениет үйіміз жоқ болғанда не істейміз деген ой болып еді. Қазір бәріміз мәдениет үйіне жиналып, неше түрлі шараларды өткізіп жатырмыз. Қазіргі кезеңде біз ғана емес, жасөспірімдерді де осыған баулып жатырмыз. Ауыл тұрғындарының өлең айтатындары келіп, өлең айтып жатыр. Мектептен би ансамблі шығып жатыр. 

Үш жылда ауданда колледж, жатақхана мектеп сынды төрт ғимарат салынды. Сонымен қатар 10 емдеу мекемесі тұрғызылды. Тағы осынша спорт кешені ашылып, сегіз мәдениет ошағы мен өзге де мекемелер ел игілігіне берілді. 

Ілияс Жұманов, Аудандық орталық аурухана директорының орынбасары:

- Бізде соңғы үш жылда ауданда 12 медициналық нысан құрылысы жүргізілді. Оның ішінде 50 пайызға жуық нысан жаңартылды. Блокты модульды ғимараттар салынды. Одан бөлек, алты нысан ұлттық жобаға сәйкес салынды.

Әлеуметтік нысандармен бірге ауданда тұрғын үй мәселесі де рет-ретімен шешіліп келеді. 2022 жылдан бері 130 отбасы баспаналы болды. Қоныс тойын тойлағандардың бірі – Үштөбелік Ақжамал Теміржанова. Екі баланың анасы бұрын көршілес ауылдағы туыстарының үйінде тұрып келген. 

Ақжамал Теміржанова, Үштөбе қаласының тұрғыны:

- Үйді жалғызбасты ана ретінде алғанмын. Үйді алғаннан кейін осы жерде тұрып жатырмыз. Жылы үй жақсы. Жақсы, таза аудан. Талдар егіліп, көркейіп жатыр. 

Мақсат Бейісбекұлы, Қаратал ауданы әкімінің орынбасары:

- Биылға мақсат 150 тұрғын үй беру. Оның 100 пәтері көпқабатты үйлерден 50 жер үйлерден. Барлық 150 үйдің бәрі Үштөбе қаласынан салынатын болады. Ауданында биыл құны 30 млрд теңге болатын алты ірі инвестициялық жобаны жүзеге асыру көзделіп отыр. Жоспар орындалған жағдайда ауыл шаруашылығы кешендері ашылып, өнім өңдеу саласы дамитын болады. 

Авторлары: Шыңғыс Қалиден, Қуаныш Түргенбаев, Жеңіс Әбдрешов