Қазақ баласы балет байқауында Еуропаны таңдай қақтырды

Будапешттегі халықаралық балет байқауында Әбілмансұр Сырманов үздік үштіктен көрінді. 21 елдің 77 бишісі өнер көрсеткен сайыста жерлесіміз жиылған жұртты таңдай қақтырды.

Әбілмансұр сайысқа түскен Junior санатында қыздар мен ұлдар жеке топтарға бөлінбегендіктен бәсеке жоғары болған. Соған қарамастан жас талант кәсіби дайындық пен техникалық шеберліктің үлгісін көрсетті.

Қазақ ұлттық хореография академиясы колледжінің 1 курс студенті Әбілмансұр Сырманов бір айда екі бірдей беделді байқауда жүлделі орын алып, ел абыройын асқақтатты.

Бұған дейін Қытай астанасында өткен 9-шы Бейжің балет байқауында алтын медаль иеленген еді. Жарысқа 10 елден 57 биші жиылған.

Ал Будапешттегі сайыста үшінші орынға тұрақтап, бірнеше арнайы марапатқа ие болды. Атап айтқанда, Венгрия би университетінің «Би әртісі» бакалавриат бағдарламасына тегін оқуға шақырылды.

Чехияның Брно қаласында өтетін Еуропалық би сайысына қатысуға мүмкіндік алды. Оған қоса Норвегия ұлттық балетінің 2-труппасында және Германияның Дрезден шаһарындағы Semperoper балетінде бір апталық тағылымдамадан өтеді. 

Әбілмансұр Сырманов, Қазақ ұлттық хореография академиясы мектеп-колледжінің 1 курс студенті:

- Будапеште мен Жизель балетінен Альберт кейіпкерін ойнадым және Сатанилла балетінен Венецианский карнавалдағы биді биледім. Жеңіске жетуге маған барлығы көмектесті. Отбасымның қолдауы, күнделікті дайындық, ұстаздарымның қолдауы. Жалпы академияның қолдауы маған көмектесті. Алдағы мақсатым – Қазақстанның балет өнерін әлемге паш ету. Отандық балеттің дамуына үлес қосқым келеді.

Жас өнерпазды байқауға классикалық би педагогы Әсет Мұрзақұлов дайындады. «Әбілмансұрдың еңбекқорлығы мен талапшылдығы оның аз уақытта үлкен нәтижеге жетуіне себеп болды», – дейді ол. Ал мұндай ірі халықаралық байқауларда жүлделі болу – елдегі балет өнерінің бәсекеге қабілеттілігінің дәлелі.

Әсет Мұрзақұлов, Қазақ ұлттық хореография академиясы арнайы пәндер бойынша пәндік-циклдік комиссиясының оқытушысы:

- Ол жерден өте үлкен білім алдық. Өйткені басқа мектептердің білімін қарайсың да, өзіңнің деңгейің төмен емес екенін көресің. Мансұрдың өте дарынды бала. Көзге көрінетін бала. Мысалы, билегенде бізде аяқтың ғана қимылы емес қой, цирктағыдай гимнастика емес. Өнер ғой бұл. Дене бітімі, көрінуі, сезінуі. Осының бәрі рөл ойнайды бізде. Сол жағынан қарағанда Мансұр келіп тұрды, өте жақсы.

Дәл қазір дайындық жұмыстары жүріп жатыр. Қарапайым көрінетін бұл жаттығулар – балеттің ең ауыр бөлігі. Сағаттап қайталанатын дәлдік, шыдам, тәртіп. Міне, әлем сахналарына шығатын жас бишілердің кәсіби жолы осындай дамылсыз дайындықтан басталады. Балет – сөзсіз сөйлейтін өнер. Мұнда әр қозғалыс – эмоция, әр қимыл – тарих.

Айта кетейік, биыл Қазақ ұлттық хореография академиясына 10 жыл. Осы уақыт аралығында орталық елідегі би өнерінің дамуына сүбелі үлес қосып келеді.

Авторлары: Дильназ Тұрғазыева, Мерей Талап