Қазақ даласында қола дәуірінің қонысы табылды

24.KZ дереккөзінен алынған мәліметтерге сүйене отырып, Qazaq24.com түсініктеме жасады..

Қазақ даласында қола дәуіріне жататын үлкен қала табылды, деп хабарлайды 24KZ. Ертіс өзенінің жоғарғы жағындағы мүйісте орналасқан «Жеті жар» қонысы екені белгілі болды. Шаһар аумағы шамамен 140 гектарды қамтиды.

Қаланың негізі 3600 жыл бұрын қаланған деген болжам бар. Қазба жұмыстарын жүргізген археологтар қала бірыңғай бас жоспар бойынша құрылғанын анықтаған. Ғалымдардың сөзінше, бұл сол дәуірдегі дала мәдениеттері үшін өте сирек кездесетін құбылыс. Яғни Жеті жар қарапайым көшпелі дала қоныстарына ұқсамайды. Сондай-ақ ғалымдар түзу орналасқан жер үйінділері өзге шаруашылық нысандарын қоршап тұрғанын, ал шаһардың орталық бөлігінде әкімшілік ғимараты бар екенін тапқан. Құрылыс кезінде шикі кірпіш пен шым қолданылған. Мұндай әдіс әдетте тек оңтүстік өңірлерге тән. Айта кету керек, отандық археологтардың бұл жаңалығы туралы CNN-де жазған.

Айдын Жүнісханов, Ә.Х. Марғұлан атындағы Археология институтының ақпараттық-редакциялық бөлімінің жетекшісі:

- Алғашқы зерттеулер 2001 жылы басталды. Ол кезде отандық археологтар бұл қоныстың шекарасы өте кішкентай, 60 гектардай деп есептеді. Содан 2017 жылы үлкен халықаралық топ жұмыс жасап, геофизикалық зерттеулер жүргізіліп аумағы нақтыланды. Кеңестік заманда бұл жерлерде орман отырғызып, біраз жерлерін жыртып жіберген. Сондықтан да үлкен аумақ болуы мүмкін. Бірақ бұл шетелдіктердің назарын аударған сенсациялық жаңалық.

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.