Қазақ ғалымы әлемде теңдесі жоқ сенсорлық құрылғы жасап шығарды

Mirai Tech жобасы туралы NU ассистент профессоры «Бүгін LIVE» бағдарламасында берген сұхбатында айтып берді.

— PhD диссертациямды литий-ионды батарея тақырыбында қорғадым. Бала кезімнен ғылыми фантастика жанрындағы әдеби шығармаларды көп оқитынмын. Сол шығармалар мені шабыттандырды. «Неге өздігінен қуатталатын технология жасамасқа?!» деген идея сол кезден бастап туындады. Осы оймен көптеген материалды ізденіп, нәтижесінде трибоэлектрлік наногенератор деген технологияны зерттей бастадым. Бұл бағытта бірнеше жыл бойы зерттеу жұмыстарын жүргіздім, — дейді Гүлнұр Калимулдина.

Жоба авторы жаңа технологияны нарыққа да шығарып үлгерген.

— Қазіргі таңда осы технологияны нарыққа шығарып отырмыз. Айта кетерлігі, бұл — қазіргі әлемдік деңгейде өте өзекті тақырыптардың бірі. Алайда осы уақытқа дейін ешкім бұл технологияны нарыққа дайындап үлгермеген. Ал Қазақстанда, нақты айтқанда Назарбаев университетінде жасалған бұл технология қазір өзімізде қолданылып жатыр. Бұл жобаны стартап ретінде іске қосқанымызға әлі бір жыл болған жоқ. Бұған дейін ол ұзақ уақыт бойы ғылыми жоба ретінде ғана танылған. Қазір инвестиция тартып, нарыққа шығардық. Шетелдік инвесторлар тарапынан да қызығушылық бар. Осыған байланысты біз қазақстандық инновацияны, қазақстандық брендті дүниежүзіне қалай шығаруға болады деген стратегиялық жоспар жасап жатырмыз. Себебі бұл — өте жаңа технология, — дейді ғалым.

Гүлнұр Калимулдина сенсорлы құралды жетілдіріп жатқанын жеткізді.

— Біз жасаған құрылғыны жай ғана ұлтарақ ретінде емес, бүкіл денеге орналастырылатын қозғалыс сенсорлары ретінде әзірледік. Бұл сенсорлар өте сезімтал, кез келген қозғалысты бірден анықтай алады. Оған қоса, құрылғы тоқпен жұмыс істейді. Қазіргі таңда біз тек ақпарат беру және Bluetooth байланысын пайдалану үшін батарея қолданамыз, ал сенсордың өзі өздігінен жұмыс істей береді, — дейді ол.

Студия қонағы Mirai Tech жобасы қалай жұмыс істейтінін түсіндірді.

— Адам 2 минут жүргеннен кейін, оның дене қозғалысы бойынша майтабандық, қозғалыс асимметриясы, жүру мәнері және басқа да параметрлер анықталып, толық ақпарат алынады. Біз бұл құрылғы арқылы машықтық оқыту әдісімен 17 түрлі диагнозды көруге мүмкіндік алдық. Қазіргі уақытта өзге диагноздарды жүйеге біртіндеп қосып жатырмыз, — дейді маман.

Ақылды сенсорлар алдағы уақытта спорт саласында кеңінен қолданылмақ.

— Қазіргі таңда жобамыз спорт саласына бағытталып отыр. Себебі елімізде спортпен айналысатын талантты балалар көп. Алайда олардың үлкен жетістіктерге жетуі үшін жарақат алмай, дұрыс техникамен жұмыс істеуі маңызды. Жүруі, жүгіруі, секіруі — бәрі біздің технология арқылы бақыланып, мықты балаларды кішкентайынан бастап жүйелі түрде дамытуға болады. Яғни біз жарақаттың алдын аламыз, техниканы қадағалаймыз, ақпаратты жинаймыз, цифрлық профиль жасаймыз. Осындай жаңа технология арқылы балаларымыздың жоғары деңгейге жетуіне жол ашылады, — дейді Гүлнұр Калимулдина.

Жас ғалымның айтуынша, Mirai Tech жобасының әлемде ешқандай баламасы жоқ.

— Бүгінгі таңда біз жасаған сенсорлар арқылы барлық клиникалық және реабилитациялық процестерді бақылауға болады. Әртүрлі шетелдік ұйымдарға хабарласып, мұндай технологияның бар-жоғын сұрап жатырмыз. Олардың айтуынша, мұндай құрылғыны әлі көрмеген. Қытай мен АҚШ-та бәсекелестеріміз бар, бірақ біз олардан бір қадам алда тұрмыз. Өйткені біздің сенсорлық құрылғымыздың әзірге аналогі жоқ. Егер бұл сенсорды жаһандық нарыққа жылдам шығарып, оның базасын және сараптамалық жүйесін мықты етіп жасай алсақ, алғаш болып бұл технологияны таныстыруымыз әбден мүмкін, — дейді студия қонағы.

Айта кетейік, акушерлік және гинекология саласындағы қазақстандық мамандар Оңтүстік Африка Республикасының Кейптаун қаласында өтіп жатқан XXV Дүниежүзілік FIGO конгресіне қатысты.