Қазақ музыкасының қара шаңырағына 90 жыл толды

Биыл Жамбыл атындағы Қазақ мемлекеттік академиялық филармониясының құрылғанына 90 жыл. Отандық композиторлардың басын қосып, ұлттық өнерді биік деңгейге көтерген ұжымның мерейлі мерекесіне орай гала-концерт өтті. Филармония қазақ музыкасының бай мұрасы мен әлемдік классиканы бір арнаға тоғыстырған. Қазір мұнда бірнеше оркестр, капелла, квинтет пен квартерттер өнер көрсетеді. 

90 жылдыққа арналған гала-концерт «Махамбет» күйімен ашылды. Рухты шығарманы Нұрғиса Тілендиев атындағы «Отырар сазы» оркестрі, Төлепберген Әбдірашев атындағы симфониялық оркестр және үрмелі аспаптар оркестрі бірге орындады.  Ерекше кеште филармонияның жеті ұжымы бір сахнада өнер көрсетті. 

Абзал Қуанышұлы, Жамбыл атындағы қазақ мемлекеттік академиялық филармониясы директорының орынбасары:

- Ол жерде бүкіл ұжым қатысатын болады. Сонымен қатар Бетховеннің тоғызыншы симфониясының үлкен бір бөлігі көрсететін болады. Сонымен қатар қазіргі қазақстандық композиторлар, жас копмозиторлар, қазіргі орта буын композиторлардың шығармалары, тіпті премьерасы болатын шығармалар бүгін орындалатын болады. 

Мерейтойлық концертте Мемлекет басшысы Қасым-Жомарт Тоқаевтың ұжымға жолдаған құттықтау хаты оқылды. Президент еліміздегі тұңғыш филармонияның мәдени өмірдегі мән-маңызын ерекше атап өтті. Филармонияда ұзақ жыл еңбек еткен ардагерлер де кеш төрінен табылды. 

Артық Тоқсанбаев, Қазақстан композиторлар қауымдастығының төрағасы, композитор:

- Брусиловский, Хамиди, Төлебаевтан бастап қазіргі біз бармыз композитор. Бізден жастау композитор солардың шығармалары орындалып жүр. Шетелдік композиторлармен қатар қазақтың музыкасы да үзілмей орындалып жүр. 

Ермұрат Үсенов, Қазақстанның Еңбек сіңірген қайраткері:

- Аталған коллективтердің бәрі алға қарай өте берсін, өсер берсін. Соынмен осы біздің филармониямыз қазақтың өнерін биік дәрежеде дүниежүзіне таныта берсін деймін. 

Гала-концертте Мұқан Төлебаев, Еркеғали Рахмадиев, Тілес Қажғалиев, Әділ Бестібаевтың шығармалары орындалды. Сонымен қатар тыңдарманға әлемдік классиктердің туындылары да ұсынылды. Жамбыл атындағы Қазақ мемлекеттік академиялық филармониясы қазақ музыкасының алтын дәуірі. Бұл кеш ұлттық өнердің ұлылығын көрсетіп,  таңдарманға ұмытылмас әсер сыйлады. 

Авторлары: Аршын Кемелжан, Кенже Амраев