Қазақстан БАӘ: энергетикалық ынтымақтастық

Қазақстан мен Араб әмірліктері жаңартылған энергия саласында екіжақты ынтымақтастық аясын кеңейтеді.

Әсіресе жел және күннен қуат өндіру ісіне басымдық беріледі. Тақауда тараптар осы бағытта тиісті мәмілеге қол жеткізді. Соның аясында әуелі Жамбылда қуаттылығы 1 гигаватт болатын ірі электр станциясы салынады. Кейін тәуліктік генерация жүйесіне негізделген тағы бір ауқымды жоба қолға алынады. Бұл жайында Әмірлік компаниясының өкілдері арнамызға берген сұхбатында мәлім етті.

Араб әмірліктері жаңартылған қуат көзі саласында әлемнің 30-дан астам мемлекетінде ірі жобаларды жүзеге асырған. Бұл бағытта тәжірибесі мол. Қазір ішкі нарық тұтынатын электр энергиясының 30 пайызы атом, жел және күн генерациясынан алынады. Арабтар сол әлеуетін Орталық Азияда кәдеге жаратуға ниетті. Әсіресе Қазақстан және Өзбекстанмен тиімді ынтымақтастық орнатқан. Ірі инвесторлары біздің елге бірнеше миллиард доллар қаржы құятынын растады. Мамандардың айтуынша, мұндай әріптестік экономикалық байланыстарды тереңдетіп қана қоймай, экологиялық ахуалды жақсартады.

Абдулазиз Алобаидли, БАӘ энергетикалық компаниясының бас операциялық директоры:

- Біз Қазақстанда Орталық Азия бойынша ең ірі жел электр станциясын саламыз. Оның жанында 600 мегаватт-сағат энергия жинақтау орны болады. Бұл біз жүзеге асыратын жалғыз жоба емес. Екі елдің ортақ мақсаттары көп. Қазақстанның ұлттық әл-ауқат қорымен ұзақмерзімді серіктестік орнатып, бірлескен жобалардың тиімділігін көреміз деген сенімдемін.

Инвесторлардың пайымы бойынша Қазақстан табиғи ресурсқа бай. Оны тиімді әрі тиісті мақсатта қолдана білетін адам капиталы жетерлік. Ішкі нарық сұранысы ауқымды. Жалпы баламалы қуат өндіру әлемдік деңгейде тұрақты даму бағытына айналған. Еуропалықтар да бұл бағытқа баса мән береді. «Белгілі бір ресурсқа тәуелділікті тұрақтандыру тәсілі - осы», - дейді. Сондықтан энергия тұтыну мөлшерінде үлесін арттыруға кіріскен. Бір айта кетерлігі, сарапшылар қазақ-әмірлік бастамаларын жоғары бағалайды. Тіпті келешекте Қазақстанның кәрі құрлыққа жаңартылған энергия экспорттау мүмкіндігі жоғары деп топшылайды.

Адмир Шахманович, Мемлекеттік басқару реформалары саласындағы сарапшы:

- Қазақстанмен мемлекеттік басқару реформалары саласында бірлесіп жұмыс істегенмін. Сөзсіз, сіздің еліңіздің нарығы үлкен. Ресурсқа да бай. Тұрақты дамуға жетіп артылады. Қандай да бір энергия көзіне тәуелді болып қалмас үшін сол ауқымды әлеуетін жан-жақты пайдалана білуі қажет.

Айта кетейік, әмірліктер қаржыландыратын Жамбылдағы жел электр станциясының құрылысы келер жылдың алғашқы тоқсанында басталады. Содан кейін тараптар тәулік бойы энергия өндіретін, қуаттылығы 500 мегаватт болатын тағы бір ауқымды нысан жобасын қолға алады. Демек әріптестік бір ғана бағытпен шектелмей, сан қырынан дамиды.

Авторы: Рауан Мыңбай