Қазақстан балалар үшін қауіпсіз бе? Халықаралық зерттеу нәтижесі

ЮНИСЕФ-тің Еуропа және Орталық Азия бойынша балаларды қорғау мәселелері жөніндегі өңірлік кеңесшісі Аарон Гринберг Қазақстанның физикалық және психологиялық жазалау деңгейін төмендету бойынша өңірлік көшбасшылар қатарына енгенін атап өтті, деп хабарлайды Egemen.kz.

Бұл деректер ЮНИСЕФ әр бес жыл сайын жүргізетін халықаралық «МИКС» зерттеуінің нәтижелеріне негізделген.

ЮНИСЕФ — Біріккен Ұлттар Ұйымының Балалар қоры. Бұл — бүкіл әлемде балалардың құқықтарын қорғау, өмірін сақтау және әл-ауқатын қамтамасыз етумен айналысатын ең танымал ұйымдардың бірі.

«МИКС зерттеуі көрсеткендей, Қазақстанда тәрбиелеу барысында зорлық-зомбылық әдістерінің төмендеуі байқалады. Бұл — жүйелі профилактикалық шаралар мен күш-жігердің нәтижесі. Енді осы төмендеуге не себеп болғанын түсініп, олардың тәжірибесін пайдалану маңызды», – деді Аарон Гринберг.

Конференцияға Еуропа мен Орталық Азияның 32 елінің үкіметтері қатысып жатыр.

Биыл Қазақстанда жасөспірімдер тарапынан 1600 қылмыс тіркелді. Бұл туралы Ішкі істер министрі Ержан Сәденов мәлімдеген еді.

Министрдің айтуынша, жасөспірімдер қылмыстарының басым бөлігі ұрлық, бұзақылық, тонау және есірткі айналымына қатысты деректерден тұрады.

Сондай-ақ өткен жылы енгізілген түзетулер аясында буллинг үшін 256 құқық бұзушы жауапқа тартылған. Министрлік балалар мен жасөспірімдер арасындағы құқық бұзушылықтың алдын алу бағытындағы жұмыстарды күшейту қажеттігін атап өтті.

Мәжіліс депутаты Ринат Зайытов қазіргі балалардың қатыгез екенін жасырмады. Оған ата-ана тәрбиесі тікелей әсер ететінін алға тартты.

Қазақстан бойынша шамамен 75 кәмелетке толмаған бала қамау орындарында жазасын өтеп жатыр. Сонымен қатар, Алматы облысындағы Жаугашты ауылында орналасқан әйелдер колониясында шамамен 600 сотталған әйел бар. Сол мекеме жанындағы Бөбектер үйінде 50-ден астам бала аналарының қасында өмір сүреді.