Қазақстан БҰҰ қайырымдылық ісіне атсалысты

Қазақстан Газа мен Суданда жапа шеккен халыққа арналған қайырымдылық жәрмеңкесіне қатысты. Біріккен Ұлттар Ұйымының гуманитарлық бастамаларын қолдауға арналған іс-шараға еліміздің Нью-Йорктегі тұрақты өкілдігі атсалысты.

Игі іске Ислам мәдени қоғамы мен өзге де ділі мен діні жақын бауырлас халықтар да үлес қосты. Олар жәрмеңке қонақтарына өз мәдениеттерінен сыр шертетін қолөнер бұйымдарын, тіл үйірер ұлттық тағамдарын ұсынды. Қазақстан стенді де қазы-қартадан бастап, төл дастарқанымыздың тәтті-дәмділеріне толы болды. Жиналған қаражат палестиналық босқындарға көмек көрсету жөніндегі Таяу Шығыс агенттігіне және Судандағы гуманитарлық операцияларды жүзеге асыратын «Шекарасыз дәрігерлер» халықаралық ұйымына беріледі.

Ранда Моһамед Салама Ахмед, іс-шараны ұйымдастырушы:

- Ислам мәдени қоғамының мұрындық болуымен Біріккен Ұлттар Ұйымындағы барша мұсылман халықтардың басын қосып, осындай қайырымдылық шарасын ұйымдастырып отырмыз. Жыл сайын мұқтаж болған өңірлерге шамамыз келгенше көмектесіп келеміз. Бірақ кейінгі үш жылда басты көңіл Газадағы балалардың жағдайына бөлініп отыр. Биыл Суданға да қол ұшын созбақпыз.