Қазақстан мен Еуроодақ кедендік реттеу және цифрландыру мәселелерін қарастырды

Іс-шара екіжақты ынтымақтастықты нығайтуға, диалогты дамытуға және кедендік реттеу, өзара іс-қимыл мен сауданы цифрландыру салаларында үздік тәжірибелермен алмасуға бағытталды.

Отырыс барысында Еуропалық одақ пен Қазақстан өкілдері өзара қызығушылық тудыратын кең ауқымды мәселелерді қарастырды.

Атап айтқанда, Еуропалық одақ кеден заңнамасын реформалау барысы туралы өзекті ақпарат ұсынды. Оның ішінде ЕО-ның жаңа Кеден кодексінің ережелері, ЕО Кеден органын құру бастамасы, сондай-ақ электронды коммерцияны реттеу мәселелері қамтылды.

Қазақстан тарапының сұрауы бойынша уәкілетті экономикалық операторлар бағдарламасын іске асыру тәжірибесі мен оны одан әрі дамыту перспективалары да таныстырылды.

Өз кезегінде Қазақстан Республикасы ұлттық кеден заңнамасы мен әкімшілік рәсімдердегі соңғы өзгерістерге шолу жасады.

Тараптар сауданы жеңілдетуге бағытталған қазіргі цифрлық бастамаларды талқылады. Оның ішінде тауардың шығу тегі сертификаттары сияқты электронды құжаттарды өзара тану перспективалары қарастырылды.

Сондай-ақ отырыс аясында шекарада зияткерлік меншік құқықтарын қорғау, құқық иелерімен өзара іс-қимыл және осы саладағы практикалық мәселелерді шешу бойынша тәжірибе алмасу өтті.

Тараптар байланыс тұлғаларының тізімін жаңартып, өзара әкімшілік көмек көрсетуге қатысты сұраулардың орындалу барысын, соның ішінде жауап беру жеделдігін талқылады.

Бұдан бөлек, тиісті Хаттаманың 3-бабының ережелерін қолдану, атап айтқанда экономикалық операторларды тексеру мәселелеріне ерекше назар аударылды.

Еуропалық одақ ЕО мен Орталық Азия елдері арасындағы көлік және логистикалық байланыстарды дамыту бастамаларын таныстырды. Атап айтқанда, 2026 жылдың қыркүйегінде Польшада өтетін тақырыптық семинарды қоса алғанда, бірлескен іс-шараларды өткізу жоспарлары айтылды.

Отырыс қорытындысы бойынша тараптар ынтымақтастықтың алдағы бағыттарын айқындап, Кіші комитеттің келесі отырысының өтетін күні мен орнын келісті.

Еуропалық комиссияның салық салу және кедендік реттеу директораты департаментінің басшысы Матиас Петшке:

— Біз кедендік ынтымақтастық комитетінің отырысын өткізіп жатырмыз. Бұл ЕО мен Қазақстан тарапынан кеден қызметтерінің өкілдері екіжақты сауданы ілгерілету, кедендік рәсімдерді жеңілдету және ынтымақтастықты кеңейту мүмкіндіктерін талқылап жатқанын білдіреді.

Бүгінгі кездесу бізге екі тараптағы заңнамалық жағдай бойынша өзекті ақпаратпен алмасуға мүмкіндік береді. Сондай-ақ бұл ынтымақтастықты тереңдетуге қажетті бағыттарды айқындауға көмектеседі.

Соңғы жылдары тәжірибе алмасу мен сауданы дамыту тұрғысынан өте табысты өзара іс-қимылдың қорытындысын жасадық. Біз дұрыс бағытта ілгерілеп келеміз, және бұл кездесу осы бағыттағы прогресті одан әрі жеделдетуге мүмкіндік береді.

Қазақстан Еуропалық одақ үшін Орталық Азиядағы негізгі серіктестердің бірі болып табылады және бұл аталған кездесуде тағы да расталды. Қазақстандық тарап Брюссельге сапары аясында Чехия мен Бельгияның ұлттық кеден қызметтеріне де барды. ЕО деңгейінде ғана емес, жекелеген мүше мемлекеттердің кедендік әкімшіліктерімен де маңызды екіжақты кездесулер өтті.