Қазақстан Жеңіске зор үлес қосты Бородавкин

АСТАНА, 12 мамыр – Sputnik. Мәскеу Қазақстанның Ұлы Отан соғысындағы Жеңіске қосқан зор үлесін жоғары бағалайды, деп мәлімдеді Ресейдің Қазақстандағы төтенше және өкілетті елшісі Алексей Бородавкин.

"Бұрынғы Кеңес Одағындағы республикалардың барлығы Жеңіске өлшеусіз үлес қосты. Барлығы майдан үшін еңбек етті, барлығы біздің жеңіске жетуіміз үшін бар күш-жігерін салды", — деді ол елшілікте өткен қабылдау барысында.

Дипломаттың айтуынша, соның айқын дәлелі ретінде "Ұлы Отан соғысы жылдарындағы Қазақстанның ерлігі" атты кітаптың жарық көруін атауға болады. Онда соғыс жылдарындағы кеңестік және қазақстандық басшылықтың қызметіне қатысты түпнұсқа архив құжаттары енген.

Бородавкин сондай-ақ 1945 жылы мамырда Рейхстагқа алғашқылардың бірі болып Жеңіс туын тіккен Рақымжан Қошқарбаевтың ерлігіне арналған кітапты таныстырды.

Бұдан бөлек, Мәскеуде Кеңес Одағының Батыры Бауыржан Момышұлы туралы құжаттар жинағы да басылып шықты. Елші Қазақстанда соғыс туралы тарихи жадыны жастардың да құрметпен сақтап келе жатқанын ерекше атап өтті.

Салтанатты рәсім барысында "Ерлігі үшін" медаліне берілген куәлік майдангердің ұлы Қуанышбек Молдағожинге табысталды.

Ал Ресей Қорғаныс министрлігінің "Отан қорғаушылары үшін" медалі "Atamnyn Amanaty" қоғамдық бірлестігінің төрағасы Мұрат Молдағалиевке тапсырылды.