Қазақстанда цифрлық деректерге негізделген экономиканы дамыту мәселесі талқыланды

«AMANAT» партиясы алаңында экономика, цифрландыру және инновациялық даму мәселелері жөніндегі Республикалық кеңестің отырысы өтті. Күн тәртібінде Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауы аясында цифрлық деректер негізінде экономиканы дамыту мәселесі қаралды, - деп хабарлайды Aikyn.kz.

Жиынға Стратегиялық жоспарлау және реформалар агенттігінің, Қаржы министрлігінің, Жасанды интеллект және цифрлық даму министрлігінің өкілдері, Мәжіліс депутаттары, республикалық кеңес мүшелері және өңірлік кеңестердің жетекшілері қатысты.

Мәжіліс депутаты әрі Кеңес төрағасы Екатерина Смышляева жиынның модераторы ретінде сөз сөйлеп, қазіргі әлемде деректер стратегиялық маңызды ресурсқа айналып, жаңа экономикалық даму моделін қалыптастырып жатқанын атап өтті.

Стратегиялық жоспарлау және реформалар агенттігі төрағасының орынбасары Олжас Төлеуовтің айтуынша, әлем елдері деректер экономикасына жүйелі түрде инвестиция салып, озық аналитикалық шешімдер, ЖИ технологиялары мен жаңа бизнес-модельдерді енгізу арқылы мол пайдаға кенеліп отыр.

- Әртүрлі елдердің тәжірибесі бүгінде Big data толыққанды экономикалық активке айналғанын көрсетіп отыр. Сондай-ақ оны монетизациялау да қарқынды дамып келеді. Big data-ны монетизациялаудың екі негізгі тәсіліне тоқталайын. Біріншісі – ішкі монетизация: бұл ретте деректер бизнестің тиімділігін арттыру, шығындарды азайту және дамуын қамтамасыз ету үшін пайдаланылады. Екіншісі – сыртқы монетизация, яғни, деректерді сату, аналитикалық сервистер ұсыну немесе сол деректер негізінде жасалған өнімдер арқылы келетін табыс, – деп атап өтті Олжас Төлеуов.

Қазақстанда да ауқымды деректер негізінде экономиканы дамыту қарқын алып, Data economy біртіндеп қалыптасып келеді. Алайда Олжас Төлеуовтің айтуынша, саланың әлеуеті әлі толық пайдаланылмай отыр.

- Себебі, бізде деректер негізінен ішкі тиімділік мақсатында қолданылуда, ал сыртқы монетизация шектеулі. Негізгі кедергілер – бірыңғай нормативтік құқықтық базаның жоқтығы, деректердің қолжетімдігі мәселесі, құпиялылық және деректер сапасы мәселелері. Ұйымдар арасында деректерді алмастыру мен саудалауға қатысты нақты ережелер жоқ, сондай-ақ деректерді жеткізушілерінің қызметіне қойылатын талаптар нақтыланбаған, - деді Стратегиялық жоспарлау және реформалар агенттігі төрағасының орынбасары.

Сондықтан деректер экономикасын дамыту үшін деректерді басқарудың бірыңғай саясаты, сапа стандарттары, құқықтық негіздер мен биржа инфрақұрылымы қажет.