Қазақстанда қысқы шиналарға интернет алаяқтар шабуылын бастады

Иллюстрациялық фото

Қазақстанда күн суыта бастаған тұста автокөлік жүргізушілеріне қысқы шиналарды өте арзан бағамен ұсынатын интернет-алаяқтар белсенділік танытуда. Алдын ала төлемді алған соң, қаскөйлер ізін суытып, сатып алушыларды ақшасыз әрі тауарсыз қалдырады.

ІІМ-нің Киберқылмысқа қарсы іс-қимыл департаментінің мәліметінше, алаяқтар қысқы шиналарды сату туралы хабарландыруларды интернет-платформаларда, әлеуметтік желілер мен мессенджерлерде жариялайды.

Сатып алушыларды тарту үшін олар шиналарды нарықтағы бағадан әлдеқайда арзанға ұсынады. Әлеуетті сатып алушы сатушымен байланысқан кезде, оған тауарға сұраныстың жоғары екені және оның тез таусылып қалуы мүмкін екені айтылады.

Алдын ала төлем сұрап, кейін ізін суытады

Шиналар жиынтығын брондау сылтауымен алаяқтар сатып алушылардан алдын ала төлем аударуды немесе тауар құнын толық төлеуді талап етеді.

Сенімге кіру үшін сатушылар сатып алушыны асықтырып, тауарға басқа адамдар да қызығушылық танытып отырғанын айтуы мүмкін.

Ақшаны алғаннан кейін қаскөйлер қоңыраулар мен хабарламаларға жауап бермей, сатып алушыны бұғаттап, хабарландыруды өшіріп тастайды.

Нәтижесінде автокөлік жүргізушілері қысқы шиналарсыз қалып, аударған ақшасынан айырылады.

Алаяқтардың арбауына түспеу үшін не істеу керек?

ІІМ қысқы шиналарды интернет арқылы сатып алу кезінде бірнеше ережені сақтауға кеңес береді:

Тауарды алмай тұрып, бейтаныс сатушыларға алдын ала төлем немесе толық соманы аудармау.

Күдік тудыратындай арзан бағамен жарияланған хабарландыруларға сақтықпен қарау.

Мүмкіндігінше шиналарды ресми дүкендер мен сенімді сауда орындарынан сатып алу.

Ақша төлемес бұрын тауардың бар-жоғын және жағдайын жеке тексеру.

Күмәнді сілтемелерге өтпеу, банк деректемелері мен SMS-кодтарды бөгде адамдарға бермеу.

Ведомство өкілдері әсіресе бірден алдын ала төлем жасауды талап ететін сатушылардан сақ болу керектігін атап өтті.

Ақша аударып қойған жағдайда не істеу керек?

Егер сатып алушы алаяқтарға тап болса, ІІМ полицияға 102 нөмірі арқылы дереу хабарласуға кеңес береді.

Сондай-ақ сатушымен хат алмасуды, хабарландырудың скриншоттарын, телефон нөмірін, төлем құжаттарын және қаскөйлерді анықтауға көмектесетін басқа да мәліметтерді сақтап қою ұсынылады.

Полиция қысқы шиналарға сұраныс дәстүрлі түрде артатын маусымда автокөлік жүргізушілерін барынша мұқият болуға шақырды.

Бүгін, 14:39