Атырауда блогер Нұрлан Жанбырбаевқа қатысты сот жалғасып жатыр

Атырауда Жангелдин ауылындағы отбасының жоғалуына қатысты жарияланымдарымен танылған 32 жастағы Нұрлан Жанбырбаевқа қатысты сот процесі жалғасып жатыр.

№2 қалалық сотта Жанбырбаевқа бірнеше рет алаяқтық жасады деген айып тағылған. Іс бойынша 12 жәбірленуші бар. Болжамды шығынның жалпы сомасы шамамен 13 миллион теңгені құрайды. Оның 9 миллион теңгеге жуығы қайтарылған.

Айыпталушы тағылған айыптармен келіспейді. Оның айтуынша, қаржылық қиындықтар өз қаражаты мен қарызға алынған ақшаны салған бизнесі сәтсіздікке ұшырағаннан кейін басталған.

Такси шақыруға арналған қосымшадан миллиондаған қарызға дейін

2021 жылы Жанбырбаев Jetu такси шақыру қосымшасын әзірлеуге кіріскен. Жоба шынымен болған, ал әзірлеушінің өзі 2022 жылы оны жасау туралы ашық айтқан. Сол кезде ол сервисті дамыту үшін үш көлігін сатқанын, қарызға ақша алғанын және инвесторлар іздегенін мәлімдеген.

Қосымша Google Play платформасында жарияланып, такси қызметімен айналысатын компания тіркелген.

Жанбырбаевтың айтуынша, тартылған қаражат бизнесті дамытуға жұмсалған. Алайда 2024 жылы қиындықтар туындаған. Айыпталушының сөзінше, басқа бір компания оның қосымшасын көшіріп алып, Атырауға барған Цифрлық даму министрлігі өкілдеріне өз әзірлемесі ретінде таныстырған. Оның нұсқасы бойынша, осыдан кейін бизнес жұмысын тоқтатқан.

«Егер мен жобаға ақша жинап алып, ештеңе істемей, ізім-ғайым жоғалып кетсем, онда мені алаяқ деуге болар еді. Бірақ мен қосымшаны іске қостым, кәсіпкерлік субъектісін аштым және есеп жүргіздім», – деді Жанбырбаев.

Бұл уақытта қаржылық міндеттемелері көбейе берген. Айыпталушының айтуынша, белгілі бір кезеңде оның жалпы қарызы 100 миллион теңгеге жеткен. Ол кредиторлар алдындағы берешегін өтеуге тырысып, басқа жобалармен айналысқан. Соның ішінде мейрамхана да ашқан. Алайда мәселелерін толық шеше алмаған.

Кейін оған қатысты қылмыстық іс қозғалды. Атырау облысы прокуратурасының бұған дейін жариялаған ақпаратына сәйкес, тергеу азаматтардан түрлі сылтаумен ақша алу деректеріне қатысты жүргізілген. Олардың қатарында инвестициялық жобалар, IT саласында оқыту, аккаунттарды бұғаттан шығару, ақша қаражатын аударуға көмектесу және техника сату болған.

Өзінің ұсталғаны туралы жаңалықты теледидардан көрген

Қылмыстық іс қозғалғаннан кейін Жанбырбаев шетелге кеткен. Оның айтуынша, біраз уақыт Дубайда жұмыс істеп, қарызының едәуір бөлігін өтей алған.

2026 жылдың басында ол халықаралық іздеуге жарияланып, кейін Түркияда ұсталған.

Айыпталушының айтуынша, ол 28 қаңтарда Самсун қаласында ұсталған. Үш күннен кейін Анкараға жеткізіліп, 18 маусымға дейін депортациялау мекемесінде болған.

Сол жерде Жанбырбаев бір күні Қазақстан телеарнасынан өзінің ұсталғаны туралы сюжетті көрген. Алайда көрермендерге көрсетілген кадрларда басқа адам болған.

«Сырттағы адамдар арқылы қазақстандық телеарналарды көруге ақша төлеп отырдық. Солайша эфирден өзімді көрдім. Қолын қайырып, алып бара жатқан адам мен емеспін. Ал Интерпол желісі арқылы елге қайтарылғаным туралы хабарланған фотода шынымен мен бейнеленгенмін», – деді ол.

Бұған дейін «Ақ Жайық» басылымы БАҚ-та тараған кадрлардың Түркияда алтын контрабандасына қатысты іс бойынша ұсталған басқа қазақстандыққа тиесілі екенін анықтаған болатын.

Қазақстанға оралғаннан кейін Жанбырбаев біраз уақыт Алматы мен Ақтөбедегі тергеу изоляторларында болған, кейін Атырауға жеткізілген. Мұнда сот оған үйқамақ түріндегі бұлтартпау шарасын санкциялаған. Қазіргі уақытта ол үйқамақта отыр.

Жангелдиндегі оқиғадан кейін танымал болды

Жанбырбаев Instagram парақшасында түрлі оқиғалар мен қоғамда резонанс тудырған қылмыстық істер туралы ақпарат жариялау арқылы кеңінен танылған.

Оның есімі әсіресе Атырау облысы Қызылқоға ауданындағы Жангелдин ауылында бір отбасының жоғалуына қатысты жарияланымдарынан кейін жиі талқыланды. Оның жазбалары әлеуметтік желі қолданушыларының назарын аударып, кеңінен таралған.

Қыркүйек айында Ішкі істер министрінің орынбасары Санжар Әділов блогердің полицияның жабық дерекқорларына қол жеткізу мүмкіндігі болмағанын мәлімдеген. ІІМ өкілінің айтуынша, тараған ақпараттың бір бөлігі қызметтік материалдардан алынған. Ал мәліметтердің сыртқа шығуына жол берген лауазымды тұлғалар жауапкершілікке тартылған.

Сол кезде ІІМ Жанбырбаевқа алаяқтық бойынша 12 эпизодқа қатысты айып тағылғанын хабарлаған.

Сотта не болып жатыр?

Қылмыстық істі судья Эльмира Ойқұлова қарауда. Бұған дейінгі отырыстарда жәбірленушілердің бір бөлігі жауап берген. Тағы төрт адам түрлі себептерге байланысты сот процесіне қатыса алмаған.

Мемлекеттік айыптаушы Абылайхан Әбужановтың айтуынша, олардан жауап алынғаннан кейін сот қылмыстық іс материалдарын зерттеуге, содан соң сот жарыссөзіне көшеді.

«Санкцияда үш жылдан жеті жылға дейінгі мерзімге бас бостандығын шектеу немесе айыру жазасы көзделген. Нақты қандай жаза тағайындалатыны үкім шыққаннан кейін белгілі болады», – деп түсіндірді прокурор.

Келесі сот отырысы 6 қарашаға белгіленген. Онда қалған жәбірленушілерден жауап алу жоспарланып отыр.

Абзал КАЙРАТУЛЫ

Бүгін, 16:06