Қазақстанда тұрғын үй бағасы неге өсіп жатыр?

Қазақстанда 2025 жылы тұрғын үй бағасы айтарлықтай өсті. Қазан айының қорытындысы бойынша жаңа пәтерлердің бағасы 13,1%-ға, ал екінші нарықтағы пәтерлердің құны 11,6%-ға көтерілген. Бұл өсімге бірнеше негізгі фактор әсер етті.

Біріншіден, 2026 жылдан бастап қосылған құн салығының (ҚҚС) мөлшері 12%-дан 16%-ға өсетіні белгілі болды. Құрылысты салушылар бұл өзгерісті алдын ала ескеріп, жаңа жобалардағы шаршы метр бағасына ҚҚС өсімін енгізе бастады. Халық та бағаның міндетті түрде өсетінін түсініп, сатып алуға асықты, бұл сұранысты күрт арттырды.

Екіншіден, үлестік құрылыс ережелері қатаңдатылды. Енді барлық мәмілелер тек үлестік қатысу шарты арқылы жасалады, жарнама мен кепілдікке қойылатын талаптар күшейтілді. Бұл ұсынысты азайтып, бағаның өсуіне ықпал етті.

Үшіншіден, маусымдық белсенділік те әсер етті. Жаз-күз мезгілінде сатып алушылардың белсенділігі артып, сұраныс күшейді.

Төртіншіден, доллар бағамының өсуі құрылыс материалдарының өзіндік құнын арттырып, жаңа тұрғын үйдің бағасын қымбаттатты. Екінші нарықта да сатушылар доллар бағамына қарай бағаны реттейді.

Сонымен қатар, жеңілдікпен берілетін ипотекалық бағдарламалар тұрғын үй бағасының күрт өсуіне себеп емес. Олар ұзақ мерзімді жинақтау мен қолжетімділікті арттыруға бағытталған. Мемлекеттік бағдарламалар бойынша салынған тұрғын үйлердің бағасы үш жылға тұрақты болады.

Numbeo деректеріне сай, Қазақстанда тұрғын үй бағасы басқа ТМД елдерімен салыстырғанда қолжетімді: баға мен табыс қатынасының индексі — 9,7. Бұл көрсеткіш Ресейде — 15,45, Қырғызстанда — 14,64, Өзбекстанда — 13,58, Беларусьте — 12,59, Арменияда — 20,89.

Осылайша, тұрғын үй бағасының өсуі заңнамалық өзгерістермен, нарықтағы сұраныс пен ұсыныс теңгерімімен, маусымдық және валюталық факторлармен тығыз байланысты.

Бүгін, 13:13