Қазақстанда вакциналар үшін цифрлық “суық тізбек” енгізіледі

Қазақстан Республикасының Денсаулық сақтау министрлігі вакцинация процесін күшейту мақсатында жаңа шараларды қолға алды.

Енді балалар нысандарын алдын ала ескертусіз тексеру тәжірибесі қайта енгізіліп, вакциналардың қозғалысын бақылау үшін цифрлық «суық тізбек» жүйесі іске қосылады.

Соңғы жылдары тексерулер саны айтарлықтай қысқарған: 2012 жылы 158 мың болса, 2025 жылы небәрі 440-қа дейін төмендеген. Бұл жағдай қауіптерді болжау жүйесін әлсіретіп, инфекциялық аурулардың өршуіне ықпал еткен. Жағдайды түзету үшін ерекше мемлекеттік бақылау қайта енгізілді.

Қауіпсіздікті қамтамасыз етудің негізгі құралы — вакцинациялау процесін толық цифрландыру. Қарағанды облысында сәтті жүзеге асқан пилоттық жоба енді бүкіл республикаға таратылады. Жүйе қоймалардан бастап ауылдық емханаларға дейінгі барлық деңгейде препараттарды сақтау температуралық режимін нақты уақыт режимінде бақылауға мүмкіндік береді. Медициналық ұйымдарды заманауи тоңазытқыш жабдықтармен қамтамасыз ету жоспарланып отыр.

Сонымен қатар, негізсіз шығындарды болдырмау және ашықтықты арттыру үшін Ұлттық қоғамдық денсаулық сақтау орталығының базасында бірыңғай иммунопрофилактика орталығы құрылмақ. Министрлік вакциналардың қозғалысын есепке алу нысандарын толық цифрландырды.

Жыл соңына дейін ақпараттық жүйелердің толық интеграциясы аяқталып, ведомство халықты иммундаудың нақты деңгейін көріп, қамтудағы олқылықтарға жедел әрекет етуге мүмкіндік алады.

Бүгін, 17:08