Қазақстандық параволейболшылар әлем кубогында кезекті жеңісіне қол жеткізді

Дүниежүзілік додаға 14 ерлер және 6 әйелдер құрамасы қатысып, бақ сынап жатыр.

Биыл өз тарихында алғаш рет Азия чемпионы атанған Қазақстан ерлер құрамасы ойындарын сәтті өткізіп келеді.

Бауыржан Тахауовтың шәкірттері алдымен Италия құрамасын 3:0 есебімен тізе бүктірді. Содан кейін Польша мен Канададан дәл сондай есеппен айласын асырды.

Бүгін қазақстандық параволейболшылар Франция құрамасын 3:0 (25:21, 25:10, 25:14) есебімен ұтты. Ертең қазақстандықтар алаң иелері АҚШ-пен ойнайды.

Ұлттық құраманың бас бапкері Б.Тахауов шәкірттерінің көңіл-күйі жақсы екендігін, жоғары межеден көріну үшін барын салатынын жеткізді.

Бұл турнирдің ерекшелігі сол, 2028 жылы Лос-Анджелесте өтетін Паралимпиада ойындарына қатысу үшін рейтингілік ұпайлар беріледі. Өткен жылы Қазақстан құрамасының Париж Паралимпиадасында бесінші орынға табан тірегені белгілі.

Еске сала кетейік, бұдан бұрын қазақстандық параволейболшылардың алғаш рет Азия чемпионы атанғанын жазған едік.