Қазақстандық шошқа еті Қытай нарығына шығады

Шанхайда Қазақстан Ауыл шаруашылығы министрлігі мен Қытай Халық Республикасының Бас кеден басқармасы шошқа етін экспорттау жөніндегі хаттамаға қол қойды. Құжат Қазақстаннан Қытайға жеткізілетін өнімге қатысты инспекция, карантин және қауіпсіздік талаптарын айқындайды.

Бұл келісім — екі ел арасындағы агроөнеркәсіптік әріптестікті дамытудың жаңа кезеңі. Бұған дейін Қазақстаннан Қытайға шошқа еті мүлде экспортталмаған, қазақстандық бірде-бір кәсіпорын мұндай рұқсат алмаған еді. Енді мұздатылған және салқындатылған еттен бөлек, субөнімдер мен термиялық өңделген өнімдерді де Қытай нарығына шығару мүмкіндігі ашылады.

Ауыл шаруашылығы министрі Айдарбек Сапаровтың айтуынша, хаттамаға қол қою қазақстандық өнімдердің халықаралық нарықтағы танымалдығын арттырып, ауыл шаруашылығы мен қайта өңдеу саласының дамуына серпін береді.

Тараптар өнімнің сапасы мен қауіпсіздігін жоғары халықаралық стандарттарға сәйкестендіру мақсатында бірлескен бақылау мен инспекцияны күшейтпек.

Бүгін, 17:27