Қазақстаннан АҚШ қа бағытталған рейс Лондон арқылы орындалуы мүмкін

АСТАНА, 9 желтоқсан - Sputnik. АҚШ-қа тікелей рейсті іске қосу үшін жаңа буындағы Boeing Dreamliner ұшағы қажет, деп мәлімдеді үкіметтегі брифингте көлік министрі Нұрлан Сауранбаев.

"Ұшу Солтүстік полюс арқылы, Ресей Федерациясы арқылы жүзеге асырылады. Мұндай рейс үшін Boeing Dreamliner ұшағы қажет", - деді министр.

Қазақстан бұл ұшақты 2026 жылы алады деп күткен болатын, бірақ оны жеткізу мерзімі кейінге қалдырылды.

Ведомство басшысының айтуынша, Boeing және Airbus компанияларының тапсырыс жүктемесі шамамен 14 жылға дейін қарастырылған. 2026 жылы Қазақстанға келуі тиіс ұшақ енді тек 2027 жылы ғана күтіліп отыр.

"Air Astana қазіргі уақытта Лондонға дейінгі рейсті, содан кейін сол ұшақпен АҚШ-қа тікелей рейсті ұсынып отыр. Қазіргі уақытта бұл қажетті қашықтықтағы ұшақ пайда болғанға дейінгі шара", - деді министр.