​ Қазцинкте үш адам қаза тапты: жарылыстың себептері әлі күнге дейін жарияланған жоқ

Өскемендегі «Қазцинк» кәсіпорнында орын алған жарылысты тергеу нәтижелері маусым айында жариялануы мүмкін.

Бұл туралы Мәжіліс кулуарында Еңбек және халықты әлеуметтік қорғау бірінші вице-министрі Ербол Тұяқбаев мәлімдеді.

Оның айтуынша, төтенше жағдайды тергеу амалдары жалғасуда. Жарылыстың нақты қалай болғанын егжей-тегжейлі анықтау үшін жұмысқа университеттердің ғалымдары да тартылған.

«Біз бұл мәселеге ауқымды түрде келдік, жарылыстың жалпы қалай болғанын түсіну үшін ол жерге университеттерден ғалымдарды тартып жатырмыз. Тексеріс нәтижелерін бұқаралық ақпарат құралдарына міндетті түрде жариялаймыз. Мерзімі бойынша, меніңше, маусым айы болады», — деді Тұяқбаев.

Еске сала кетейік, Өскемендегі зауыт аумағындағы жарылыс 5 мамыр күні таңертең болған еді. Төтенше жағдайдан кейін қала үстінде қою ақшыл түтін көтерілген.

Оқиға салдарынан үш адам қаза тапты. Тағы бірнеше жұмысшы ауыр күйік алды.

Апаттан кейін Өскемен тұрғындары денсаулықтарының нашарлағанына шағымданған. Олардың айтуынша, кейбір адамдардың асқазаны ауырып, мұрын-жұтқыншақ жолдары күйген.

Сондай-ақ зауытқа жақын орналасқан тұрғын аудандарда мамандар ауадағы зиянды заттардың шекті мөлшерден асып кеткенін тіркегені хабарланған болатын.

Жарылыстың түпкілікті себептері тергеу амалдары аяқталғаннан кейін белгілі болуы тиіс.

Бүгін, 16:07