Қостанай облысындағы тас жолдың бөлігі толық жөнделіп болды

Қостанай облысының Сарыкөл ауылынан Солтүстік Қазақстан облысына дейін баратын тас жол бөлігі толық жөнделіп болды.

Оны қалпына келтіруге  2,6 миллиард тенге жұмсалды. Бұдан бөлек биыл облыс аумағындағы бес бағыт бойынша  республикалық маңыздағы күре жолдарда  орташа жөндеу жүргізілді.

Сарыкөлден Солтүстік Қазақстан облысына шығатын 27 шақырым жол бөлігі 40 жылдан астам жөндеу көрмеген. Әбден бүлініп, тозығы жеткен еді. Екі жылдың ішінде бұл аралық дұрысталып, тақтайдай тегістелді. Сарапшылар жұмыс сапасына жоғары баға беріп отыр.

Асхат Сағымбаев, "Қазавтожол" ҰК" АҚ ҚОФ директорының орынбасары:

- Асфальтты-бетонды жабындысының қалыңдығы 6 см. Екі метрлік жол жиегі жақсы нығыздалған. Қозғалыс қауіпсіздігін қамтасыз ететін 130 жол белгісі, сигналдық бағана және автопавильондар орнатылған. 

Биыл облыс жолдарын жөндеуге 103 миллиард теңге бөлінген. Салыстырмалы түрде айтсақ, өткен жылға қарағанда 40 процентке көп. Мемлекет басшысының көлік жүйесін жаңғыртуға байланысты берген тапсырмасына сәйкес, биыл Қостанайдан басқа өңірлерге шығатын күре жолдардың басым бөлігі қалпына келтірілді.

Құмар Ақсақалов, облыс әкімі:

- Мысалы ретінде айтатын болсақ, Ұзынкөл-Троебраттың жолы 70 шақырым. Екінші жол ол, Бестөбе-Ақтөбе, ол жерде 60 шақырым көлемінде жол жөнделіп, бітіп қалды. Арқалықтан Ұлытау облысының шекарасына дейін 80 шақырым негізгі жол жөнделді. Ол жерде бұрын грейдер болушы еді. Енді Жітіқара-Милютинка ол Оренбургқа шығатын жол. Ол жолдың біразын бітіріп тастадық. 

Бұл жол учаскелерінің жөнделіп, пайдалануға берілуі облыс аудандары мен көрші өңірлер арасындағы көлік қатынасын жақсартып, шағын және орта бизнестің, сондай-ақ агроөнеркәсіп кешенінің дамуына серпін береді.

Мағауия Қалиев, Сергей Трахтенберг