Құндылықтар қалыптастыратын құжат

Өз кезегінде бұл да орасан ықпалы бар арнаулы құжатпен бекітілуге тиіс. Кеше Мемлекет басшысы Қасым-Жомарт Тоқаев «Қазақстан Республикасы ішкі саясатының негізгі қағидаттары, құндылықтары мен бағыттарын бекіту туралы» Жарлыққа қол қойды. Бұл Жарлық ел саясатына, қоғам өміріне қалай әсер етуі мүмкін? Осы жөнінде сарапшылардың пікірін сұрадық.

Ерлан САИРОВ,

Мәжіліс депутаты,

«AMANAT» партиясы фракциясының мүшесі: 

– Ұлттық құрылтайдың IV отырысында сарапшылар ішкі саясат саласындағы жұмыстарды реттейтін тұжырымдамалық құжаттың қажет екенін айтқан еді. Президент бұл идеяны қолдады, енді осы аралықта бүкіл сарапшылар, аймақтардағы әртүрлі азаматтар, мемлекеттік органдар бұл құжатты жан-жақты сараптап талдау жасады. Соның нәтижесінде «Қазақстан Республикасының ішкі саясатының негізгі қағидаттары, құндылықтары мен бағыттары» атты құжат дайындалды. Құжат Президенттің «заң мен тәртіп», «халық үніне құлақ асатын мемлекет», «түрлі көзқарас – біртұтас ұлт» деп аталатын әртүрлі қағидатын қамтиды. Бұл қадамды бүгінгі өте күрделі геосаяси жағдайда Қазақстаннның ұлттық, мемлекеттік, рухани бірлігін сақтаудың негізгі тетіктерінің бірі деп есептеуге болады. Қазір Қазақстанның айналасында тұрақсыздық пайда болды, осы кезде тұрақсыз әлемде тұрақты Қазақстанды қалыптастыруда ең негізгісі – заң мен тәртіп керек. Саяси процестің барлығы тек қатаң мемлекеттік мүдде тұрғысынан жасалуы қажет.

Ғазиз ӘБІШЕВ, 

саясаттанушы:

– Идеология саласында әрдайым жүйелі жұмыс қажет. Себебі идеология саласында елімізді мінсіз күйге жеткізетін негізгі бағыттар бар. Яғни, саяси басшылар ұлттық мақсаттар мен мүдделерге, мысалы, халықтың әл-ауқатын арттыруға, саяси тұрақтылықты қамтамасыз етуге, күрделі тарихи кезеңдерде мемлекеттілікті сақтауға және күрделі геосаяси ахуалды, ішкі түрлі мәселе мен үрдістерді ескере отырып, қоғамның мінсіз қалпын құруға тырысады. Сол себепті болашаққа ұмтылуға тиіс идеалдық модель қажет. Ал оған жету үшін барлық мемлекеттік институттар өзара үйлесімді әрекет етуге тиіс.

Алайда бұл жолда да бірқатар кедергілер шығып отырады. Кейде орталықтан төменге дейінгі байланыс әрдайым тиімді бола бермейді, жергілікті деңгейдегі қызметкерлердің біліктілігі жеткіліксіз болып, идеология қағидаттарын өз түсінігінше бұрмалап қабылдайды.

Сондықтан осының бәрін бір арнаға тоғыстырып, идеологияны жүйелеу үшін нақты қағидаттар мен ішкі саясаттың бағыттары айқындалған бірыңғай құжат қажет. Ол құжатқа кез келген мемлекеттік қызметші сүйенуге тиіс. Министрліктер бөлінсе немесе біріктірілсе, әкімдіктегі бөлімдер қайта ұйымдастырылса да, тіпті облыстар бөлінсе де, бәрібір ең алдымен сол бірыңғай негізгі құжатқа сүйенуі керек.

Мұндай тәсіл ішкі саясатты жүйелейді, идеологиялық жұмысты тұрақты әрі жүйелі етеді. Өзара құрметті нығайтып, ел ішіндегі этносаралық тұрақтылықты сақтауға және қоғамда көрініс беріп жатқан түрлі өшпенділікпен күресуге мүмкіндік береді. Міне, осындай жағдайда аталған құжат қоғамдағы қайшылықтарды жұмсартып, елді табандылықпен жарқын болашаққа жетелеуге бағытталады.