Құқық қорғау саласы цифрландырылып жатыр

24.KZ парақшасынан алынған деректерге сүйене отырып, Qazaq24.com мәлімдеме жасады..

2025 жылы Павлодар облысында көшедегі бейнекамералардың көмегімен 135 қылмыс ізі суымай ашылды. Облыс аумағында 29 мың камера жұмыс істеп тұр.

Алдағы жылдары жүйені жетілдіріп, жүздеген бақылау құрылғысын орнату жоспары бар. Жалпы еліміз бойынша, бейнебақылау жүйесіне жасанды интеллект элементтері енгізіліп, саланы цифрландыруға басымдық берілуде.

Жедел басқару орталығының қызметкерлері қаладағы барлық қимыл-қозғалысты қалт жібермей қадағалап отырады. Бейнебақылау камералары түсірген кадрлар орталықтағы монитордан көрінеді. Тәулігіне төрт жүзден астам шақырту түсіп, полицейлер жедел әрекет етеді.

Ғомар Шәбиденов, облыстық ПД жедел басқару орталығы бастығының міндетін атқарушы:

- Қала бойынша шамамен үш мыңға жуық камера орнату жоспарланған болатын. Қазір оларды кезең-кезеңімен іске қосу жұмыстары жүргізіліп жатыр. Бүгінгі күні Павлодар қаласы бойынша 600 камера орнатылған. Ал аудандарда шағын жедел басқару орталықтары орнатылып, штаттық режимде жұмыс істеп тұр. Осы жүйелердің көмегімен әкімшілік құқық бұзушылықтар жиі анықталады.

Полиция департаменті толық цифрлық форматқа көшті. Бейнебақылау камераларымен қатар заманауи электронды цифрлық бақылау жүйесі енгізілді. Солардың бірі – электронды бақылау білезіктері. Бұл әсіресе учаскелік инспектордың жұмысын жеңілдетті.

Арман Қаптаев, облыстық ПД Қоғамдық қауіпсіздік басқармасының аға инспекторы:

- Біздің полиция департаментімен қазіргі кезде 50 электронды білезіктер қолданылуда. Осы электронды білезіктер бұрын сотталған адамдарға қатысты. Оларға тағып тәулік бойы күнделікті қайда орналасқанын, қайда барғанын бақылап отырады. Учаскелік полиция инспекторлары мекенжайы бойынша баруын қажет етпей, осындай профилактикалық іс-шаралар қолданылуда.

Цифрлық қауіпсіздік жүйесі барлық саланы қамтиды. Мәселен, облыс жолдарына «Мерген» аппараттық-бағдарламалық кешендері орнатылды. Автоматты жүйе Павлодар, Ақсу, Екібастұз қалаларымен республикалық маңызы бар жолдардың қауіпті учаскелерін бақылайды. Жалпы 2025 жылдың қорытындысы бойынша «Заң және тәртіп» тұжырымдамасы аясында Павлодар облысында 200 мыңнан астам әкімшілік құқық бұзушылық пен 5 мыңнан астам түрлі дәрежедегі қылмыс түрлері анықталған. Салынған айыппұл көлемі 3 миллиард теңгеден асады. Құқықтық қауіпсіздікті қамтамасыз ету ісі ары қарай жалғасады.

Авторлары: Қарлығаш Қасиетова, Марат Игіліков

Маңызды жаңалықтар мен жаңартуларды өткізіп алмау үшін Qazaq24.com сайтын қадағалаңыз.