Қырғызстандағы сайлауды Қазақстаннан барған 22 бақылаушы қадағалап жатыр

Қырғызстандағы кезектен тыс парламенттік сайлауды Қазақстаннан 22 бақылаушы қадағалап жатыр.

Миссия құрамында Орталық сайлау комиссиясының өкілдері мен Парламенттің жеті депутаты бар. Бақылаушылар Бішкек пен шекараға жақын аймақтардағы учаскелерде жұмыс істеп, дауыс берудің ұйымдастырылуы, ақпаратқа қолжетімділік және сайлау процесінің ашықтығын бағалайды. Бұдан бөлек сайлау учаскелерінің жұмысқа дайындығын және төтенше жағдайларға әзірлігін тексереді. Бұл туралы Орталық сайлау комиссиясының Төрағасы Нұрлан Әбдіров хабарлады.

Нұрлан Әбдіров, ҚР Орталық сайлау комиссиясының төрағасы:

- Бүгін негізгі дауыс беріп жатқан күн. Таң ата учаскелердің ашылуына қатыстық. Сайлаушылар үлкен белсенділік танытып жатыр. Таңертең әсіресе жасы келген кісілер келіп жатыр. Арасында жастарды да көріп жатырмыз. Біраз жаңашылдық бар. Қырғызстандағы сайлау жүйесінде де. Оның ішінде қазір 33 мандаттық округтер ашылған. Соған байланысты жыныстық жағы да ескеріліп жатыр. Сарапшылардың айтуына байланысты әйелдердің Жогорку Кенешке келуі кеңінен таралып жатыр.

Айта кетейік, Қырғызстанда кезектен тыс парламенттік сайлау өткізу туралы шешім Жогорку Кенештің қыркүйекте өзін өзі таратқаннан кейін қабылданды. Бұған екі ірі электоралды науқанның бір уақытқа белгіленуі әсер етті. 2027 жылдың басында елде президенттік сайлау жоспарланған, ал парламенттік сайлау 2026 жылдың күзінде өтуі тиіс еді. Жаңа жүйе бойынша енді бір округтен сайланатын үш депутаттың бірі міндетті түрде әйел болуы тиіс. Болашақта Жогорку Кенештің үштен бірі әйелдерден құралмақ.