Қытай компаниялары Абай облысына 76,3 млрд теңге инвестиция салады

Фото: gov.kz

Қытай елінің Шыңжаң өлкесі Алтай қаласында өткен «Үлкен Алтай – 2026» халықаралық субөңіраралық ынтымақтастық конференциясы аясында 20-ға жуық шет елдік инвестормен B2B форматында өткен кездесуде Абай облыстық мәслихат төрағасы Шалқар Байбеков, кәсіпкерлік және индустриялық-инновациялық даму басқармасының басшысы Айбек Рахымбеков және салалық басқармалардың жетекшілері қатысты.

Жиын барысында инвесторлар өз жобаларын таныстырып, сауда, құрылыс, медицина, қалалық инфрақұрылым, спорт және балалар алаңдарын салу, құрылыс материалдары мен оптоэлектрондық құрылғылар өндірісі салаларындағы ұсыныстарын айтты.

Қазақстанда 6 айда инвестиция көлемі 9,5 трлн теңгеден асты

Кездесу қорытындысында Абай облысының басқармалары, аудан әкімдіктері, «Семей» әлеуметтік-кәсіпкерлік корпорациясымен Қытай компаниялары және білім беру ұйымдары арасында жалпы саны 7 ынтымақтастық құжатына қол қойылды. Оның ішінде 6 инвестициялық меморандум және білім беру саласындағы негіздемелік келісім бар. Жалпы инвестиция көлемі – 76,3 млрд теңгені немесе 146,8 миллион АҚШ долларын құрайды.

Меморандумға сәйкес өңірде гидроэлектр стансасын және алюминий зауытын, цементтен жасалған құрылыс бұйымдарын, сондай-ақ, электр сымдары мен кабель өнімдерін өндіретін зауыт ашу, Семейдегі Smart City шағын ауданының инфрақұрылымын дамыту, стандартталған спорт және балалар ойын алаңдарын орнату, Үржар ауданында заманауи жылыжай кешенін салу, Абай облысында энергия үнемдейтін электр жылыту жүйелерін енгізу және жаңа энергетика саласындағы жобаларды іске асыру жоспарланып отыр.

Қытайда шығарылған Toyota Corolla Қазақстан нарығына келді

Қытайдың Шыңжаң Алтай кәсіптік-техникалық колледжі мен Семейдегі Шәкәрім университеті арасында ынтымақтастық жөніндегі негіздемелік келісім жасалды. Құжат кәсіптік білім беру саласындағы байланысты дамытуға, оқытушылар мен студенттер алмасуға, ғылыми және мәдени ынтымақтастықты нығайтуға бағытталған.

Айта кетейік, былтыр осы «Үлкен Алтай» халықаралық конференциясы аясында Абай облысының қала және аудан әкімдіктері, басқармалар, кәсіпорындар мен қытайлық инвесторлар арасында жалпы құны 1,5 млрд АҚШ долларын құрайтын 15 меморандумға қол қойылған болатын.

Абай облысы