Қытайда қазақтың ұлттық өнері дәріптелді

Биыл Қазақстан мен Қытай мәдениеті жылы жалғасын табады.

Бұл ресми белгіленді. Негізгі іс-шаралар екі ел арасындағы мәдени-гуманитарлық байланысты нығайтуға бағытталады. Алғашқысы Қазақстанның мәдениет орталығында ұйымдастырылды. Ол қазақтың ұлттық өнерін дәріптеуден басталды.

Қытайда қазақтың ұлттық өнері дәріптелді. Халық әндері мен  ұлттық аспаптардың шығу тарихы таныстырылды. Іс-шараға бейжіңдік тұрғындар, олардың балалары және өнерпаздар қатысты. Оларға Құрманғазы атындағы Ұлттық консерваторияның ұстаздары шеберлік сағатын өткізді.

Айгүл Қосанова, ҚР Халық артисі:

- Кішкентай бүлдіршіндердің біздің аспабымызға деген үлкен қызығушылық танытып екі ұлт арасындағы ұлттық аспап арқылы достығымыхды нығайтуы бұл үлкен қуаныш деп айтуға болады. 

Қытай баласы Лан И домбыраға әуес. Биыл бес жасқа толады. Домбыра үйірмесіне қатысып жүргеніне бір жылдан асқан. Осы уақыт ішінде бірнеше күй тартып үйреніп қазір ептеп ән де айтып жүр. Ол өз өнерін Қазақстаннан келген мамандарға зор мақтанышпен көрсетті.

Сондай-ақ қазақтың көне музыкалық аспаптары туралы шағын бейнероликтер көрсетілді. Жетігеннің ерекшеліктері мен қасиеті туралы айтылды.

Лию Хуой, Бейжің ұлттық аспаптар оркестрінің артисі:

- Қазақстан мен Қытай арасындағы мәдени, музыкалық алмасуды сезіндік. Қазақ халқының музыкасы туралы тың мәлімет алдық. Мұндай іс-шараның біз сияқты үйренушілерге әсіресе балалар үшін маңызы зор. Осының арқасында қазақстандық ұстаздармен жақын танысып, тікелей байланыс орнатуға мүмкіндік алдық. Бұл бірге өсіп, дамуға үлкен мүмкіндік. 

Кездесу барысында дәстүрлі қолөнер түрлері де паш етілді. Тәжірибелі шебер сахнада киіз басып қытайларды таң қалдырды. Текемет жасау техникасын көрсетіп ою-өрнек және олардың символикасы туралы құнды мәліметтермен бөлісті.

Син Чжао, Бейжің қаласының тұрғыны:

- Маған жүннен бұйым жасау тәсілі қатты ұнады. Шебер табиғи өнімдерді пайдалана отырып аз уақытта дизайнерлік ерекше кілем жасады. Жұмсақ жүн тығыз кілемге айналды. Мен мұндай өнерді алғаш көруім. Ол текеметті маған сыйға тартты. Өте қуанып тұрмын. 

Айгүл Жансерікова, қолөнерші:

- Осындай іс-шаралар елді елмен, мәдениетті мәдениетпен қауыштырады ғой. Әрбір бұйым әрбір өнерімізде өзіміздің Қазақстанды насихаттап жатырмыз. Мына жерге мына жерге қарасаңыздар қошқар мүйіз деген біздің ою-өрнектің ішінде патшасы.

Бейжіңде қазақтың ұлттық өнері мен дәстүріне қызығатындар көбейді. Қазір жергілікті тұрғындар балаларын домбыра үйірмелеріне беріп, қазақ тілін үйренуге баулып жүр. Ал Қазақстанның мәдениет орталығы ашылғалы қос елдің мәдени-гуманитарлық байланысын нығайтуға бағытталған іс-шаралар жиі өтетін болған.

Руслан Бақытбекұлы, Мадияр Ерсайын