Қытайдан Еуропаға Арктика бағытымен жүрген алғашқы кеме барды

Жаңа бағыт басқаларымен салыстырғанда жеткізу уақытын едәуір қысқартып отыр. Қытай-Еуропа теміржол экспресс бағыты арқылы жөнелтілімдер шамамен жиырма бес күнге, Суэц каналы арқылы шамамен қырық күнге және Қайырымды үміт мүйісін айналу арқылы шамамен елу күнге созылады.

Istanbul Bridge контейнер тасушы кеме Қытайдың шығысындағы Нинбо-Чжоушань портынан шамамен 4 мың жиырма футтық контейнерлік жүкпен шықты. Жүктерді Ұлыбритания, Германия, Польша және Нидерланд порттарында түсіру жоспарланған.

Sea Legend Line Limited компаниясының бас операциялық директоры Ли Сяобинь хабарлағандай, кеме негізінен литий-ионды аккумуляторлар мен фотоэлектрлік жабдықтарды тасымалдаған. Оның айтуынша, Арктика бағыты әсіресе ыстыққа және уақытқа сезімтал жүктерді тасымалдауға қолайлы.

Саяхат кезінде кеме Норвегия теңізінде Эми дауылына тап болып, портқа жоспарланған мерзімнен екі күн кешігіп барды. Бағытқа дайындық үш жылға созылды және кеме жабдықтарын жаңарту мен экипажды оқытуды қамтыды. 2026 жылы компания мұз класындағы кемелер санын көбейтіп, тұрақты жазғы рейстерді ұйымдастыруды жоспарлап отыр.

Бұған дейін Қытай АҚШ кемелеріне арнайы порттық алым енгізетінін жаздық.