Қызылорда облысында инженерлік желілер жаңғыртылады

Қызылорда облысында жылу құбырларының 42, ал электр сымдарының 60 пайызы тозған.

Инженерлік желілер кезең-кезеңмен жаңғыртылып жатыр. Соңғы үш жылда желілерді жаңғырту бойынша 71 жоба іске асты. Бұл жұмыстар ұлттық жоба аясында жалғасын табады. Мемлекет басшысы «Түркістан» газетіне берген сұхбатында өңірлердегі инфрақұрылымды жаңғыртуға ерекше мән берілетінін айтқан еді.

Қаладағы «Сол жағалау» ықшам ауданында екінші автономды жылу қазандығының құрылысы жүріп жатыр. Нысан пайдалануға берілген кезде  55 көпқабатты жаңа тұрғын үй жылумен қамтылады. Қазан айында басталған құрылыс бүгінде 80 пайызға аяқталған.

Бағдәулет Сәдібеков, мердігер мекеме өкілі:

- Дәнекерлеу жұмыстары құбырларды жүргізуде. Сол біткеннен кейін әрі қарай автоматика, электр желірерін қосу, горелкаларды қосып, сынаққа қоямыз. Содан кейін осы қаңтар айының соңына қарай тексеріске қойылып, әрі қарай желіге жылу беруге дайын болады.

Қасанғали Иманғалиев, Жылу-электр орталығы директорының міндетін атқарушы:

- Қазіргі таңда сол жағалауда №17 автономдық бу қазандығы бар. Ол - 52 МГбатт. Қазіргі таңда 91 көпқабатты тұрғын үй мен 10 нысанды жылумен қамтамасыз етіп отыр. Бу қазандықтың салынуы сол жағалауда көпқабатты тұрғын үйлердің құрылысының ұлғаюына байланысты және әлеуметтік нысандардың көбеюіне байланысты 40 МГ батттық автономдық қазандық салынуда.

Өңірде жалпы ұзындығы 217 шақырым жылу желісі бар. Былтыр 8,7 шақырым құбыр жаңғыртылды. Алдағы төрт жылда жылу құбырларының тозу деңгейін 30 пайызға дейін төмендету жоспарланып отыр. Одан бөлек, соңғы үш жылда облыста электр желілерін жаңғырту бойынша 71 жоба іске асқан.

Тахир Нәдірбек, Энергетика және ТҮКШ басқармасы басшысының орынбасары:

- 24,1 млрд теңгені құрайтын 1 300 шақырым электр желілері, 287 дана қосалқы станция жаңғыртылды. Нәтижесінде электр қондырғыларының тозуы 69 пайыздан, 60 пайызға дейін төмендеді.

Облыс орталығында салынған жылу электр орталығы қазір тесттік режимінде жұмыс істеп тұр. Ұлттық жоба аясында алдағы төрт жылда өңірдегі электр желілерінің тозуын 60 пайыздан 45 пайызға дейін азайту көзделген. Сонымен қатар күн және жел электр станцияларын салу жоспарланған. Ауызсу және кәріз жүйелерін жаңғырту жұмыстары да кезең-кезеңімен жүзеге асырылады.

Авторлары: Нұрлан Жақыпбеков, Ақан Әлиев