Қызылордада 20 жастағы жігіттің өлімі: Полиция үш күдіктіні ұстады

Қызылордада кафенің маңында бір топ адамның шабуылынан кейін көз жұмған 20 жастағы Александр Ивановтың өлімі тергеліп жатыр. Жас жігітке пышақпен үш рет соққы жасалған. Оның әпкесі шабуылға қатысқандардың барлығы бірдей жауапқа тартылмай қала ма деп алаңдайды.

Ал полиция үш күдіктінің ұсталғанын хабарлады, деп жазады Shyndyk.kz.

Қайғылы оқиға 8 қазанда болған. Марқұмның әпкесінің айтуынша, Александр достарымен бірге кафеде демалып отырған. Жанжал оның таныстарының бірі мен жергілікті диджейдің арасында басталған көрінеді.

Туысының сөзінше, жанжалдан кейін диджей өз таныстарын шақырған. Осы уақытта Александр темекі шегу үшін сыртқа шыққан. Сол жерде оған 8–9 адамнан тұратын топ шабуыл жасаған болуы мүмкін.

Жас жігіттің арқасына, кеудесіне және жүрек тұсына пышақпен үш рет соққы жасалған. Оны ауруханаға жеткізгенімен, дәрігерлер өмірін сақтап қала алмады. Александр жансақтау бөлімінде көз жұмды.

Александр ата-анасынан ерте айырылып, тұл жетім қалған. Ол қайтыс болғаннан кейін жалғыз жақын туысы әпкесі болып қалды. Қазір ол істің объективті тергелуіне қол жеткізуге тырысып жүр.

Қыздың айтуынша, бастапқыда кісі өлтірді деген күдікпен тек бір адам ұсталған. Ол топтық шабуылға қатысы бар басқа адамдардың жауапкершіліктен жалтарып кетуінен қауіптенген.

Сондай-ақ марқұмның әпкесі тергеу барысында заңбұзушылықтар болуы мүмкін екенін мәлімдеді. Оның сөзінше, тергеуші оған бауырының қайтыс болғаны туралы хабарламаған. Ал кафенің маңындағы және көршілес ғимараттардағы бейнебақылау камераларының жазбаларын алу мүмкін болмаған. Оның айтуынша, камералар жұмыс істемеген болуы мүмкін.

Бұдан бөлек, туысының мәлімдеуінше, жанжал кезінде зардап шеккен әрі оқиғаның куәгері болған Александрдың досына қысым көрсетілген. Оны кешірім туралы арыз жазуға көндірмек болған көрінеді.

Кейін Қызылорда облысының полиция департаменті іс бойынша үш күдіктінің ұсталғанын хабарлады. Олардың барлығы уақытша ұстау изоляторына қамалған.

Құқық қорғау органдарының мәліметінше, тергеушілер тәркіленген бейнежазбаларды зерттеп, жанжалға басқа адамдардың қатысы болуы мүмкін екені туралы ақпаратты тексеруді жалғастырып жатыр.

«Іске қатысы бар әр адамның рөлі мен қатысу дәрежесіне тергеу қорытындысы бойынша құқықтық баға беріледі», — деп хабарлады полиция департаменті.

Ведомство қылмыстық істің департамент басшылығының ерекше бақылауында екенін атап өтті.

Бүгін, 10:49