Қызылша мен тұмау әлі тіркеліп жатыр, дегенмен жағдай бақылауда министрлік

Бұл туралы ҚР Денсаулық сақтау министрлігінің баспасөз қызметі хабарлады.

Баспасөз қызметінің мәліметтеріне қарағанда, осы кезеңде зертханалық расталған тұмаудың 3 018 жағдайы анықталды, оның ішінде: А тұмауы вирусы (H3N2) - 2 958 жағдай, А тұмауы вирусы (H1N1) - 53 жағдай, В тұмауы вирусы - 7 жағдай.

Тұмаудың профилактикасы шеңберінде 2 272 739 адамға вакцина салынды, бұл халықтың 11,13%-ын құрайды және ДДҰ ұсынымдарына сәйкес келеді.

Білім беру ұйымдарындағы оқу процесі штаттық режимде жүзеге асырылады. Оқушылардың арасындағы сырқаттанушылық сыныптағы оқушылар санының 20%-нан аспайды.

Денсаулық сақтау министрлігі профилактикалық шараларды сақтау қажеттілігін еске салады: қолды үнемі жуу, үй-жайларды желдету, ылғалды тазалау, сондай-ақ аурудың белгілері болған кезде адамдар көп жиналатын жерлерге баруды шектеу.

Сонымен қатар, елде қызылша ауруы әлі тіркеліп жатыр. 2025 жылдың қараша айынан бастап сырқаттанушылық өскен. Жағдайлар Шымкент қаласын қоспағанда, еліміздің 19 өңірінде тіркелген.

Сырқаттанушылардың негізгі үлесі егілмеген халыққа тиесілі - жағдайлардың 80%-ы, бұл ретте балалардың 58% - ы ата-аналарының бас тартуы салдарынан вакцина салынбаған.

Вакцинациялау қызылша профилактикасының жалғыз тиімді шарасы болып қала береді. Денсаулық сақтау министрлігі ата-аналарға ұлттық күнтізбеге сәйкес балаларда профилактикалық егулердің болуын тексеруді және қажет болған жағдайда тіркелген жері бойынша медициналық ұйымдарға жүгінуді ұсынады.

Сонымен қатар, Оңтүстік-Шығыс Азияның бірқатар елінде Нипах вирусы бойынша эпидемиологиялық жағдайдың күрделенуіне байланысты ҚР Мемлекеттік шекарасы арқылы өтетін барлық өткізу пункттерінде санитариялық-карантиндік бақылау күшейтілді.

Үндістанды қоса алғанда, осы инфекция бойынша қолайсыз елдерден келген азаматтарға ерекше назар аударылады. Мұндай елдердің тізімі үнемі жаңартылып отырады.

Халықаралық әуежайларда қоғамдық денсаулық сақтау саласындағы төтенше жағдайларға ден қою бойынша ведомствоаралық оқу-жаттығулар өткізіледі. Медициналық ұйымдар жоғары дайындық режиміне ауыстырылды, дәрілік заттардың, жеке қорғану құралдарының және дезинфекциялық препараттардың қорлары қамтамасыз етілді.

Осыған дейін елде 400-ге жуық денсаулық сақтау субъектісі қызметін тоқтатқаны туралы жаздық.