Ресейлік компания Qarmet алдындағы 613 млн теңге қарызын өтейді

Ресей соты қазақстандық Qarmet компаниясының пайдасына шешім шығарып, Ростовтағы металлургиялық кәсіпорынды берешегін қайтаруға міндеттеді.

Ростов облыстық төрелік соты қаулысына сәйкес, «Ростов металлургиялық компаниясы» Қазақстан тарапына 92,8 млн рубль (шамамен 613 млн теңге) көлеміндегі қарызын өтеуі тиіс.

Бұл шешім бұған дейін Қарағанды облысының экономикалық соты шығарған үкімді растады. Ресейлік тарап апелляциялық шағым түсіргенімен, қазақстандық сот инстанциялары алғашқы шешімді өзгеріссіз қалдырған.

Сот процесі барысында ресейлік компания дауды бейбіт жолмен шешуді ұсынып, істі кейінге қалдыруды сұраған. Алайда Qarmet бұл ұсынысты қолдамаған. Нәтижесінде Ресей соты шетелдік сот актісін толық мойындап, оны өз аумағында орындауға міндетті деп таныды.

Ашық деректерге сәйкес, «Ростов металлургиялық компаниясының» қаржылық жағдайы әлсіреген: 2024 жылы табысы болғанымен, таза пайдасы төмендеген.

Айта кетейік, Qarmet қазіргі таңда қазақстандық кәсіпкер Андрей Лаврентьевтің бақылауында.