R.O.I. қаржы пирамидасын ұйымдастырушының 25 пәтері мен 3 автокөлігіне тыйым салынды.

Қаржылық мониторинг агенттігінің Алматы қаласы бойынша департаменті тұтыну кооперативі кейпінде жұмыс істеген "R.O.I" қаржы пирамидасын құру және оған басшылық ету дерегі бойынша тергеу жүргізіп жатыр. Жаңа мәліметтер белгілі болды, деп хабарлайды Tengrinews.kz.

Схема қалай жұмыс істеді?

Ведомствоның баспасөз қызметінің мәліметінше, қазақстандықтарға автокөлік пен жылжымайтын мүлік сатып алу бағдарламаларына қатысу ұсынылған. Ол үшін олармен пай жинақтау келісімшарттары жасалып, ақшалай жарналар қабылданған.

Анықтама: Пай жинақтау - бұл пәтер немесе автокөлік сатып алу сияқты белгілі бір мақсат үшін осындай жарналарды біртіндеп жинау процесі.

Бұл ретте, ҚМА ақпаратынша, жаңадан келгендердің жарналары табыс әкелетін және барлық клиентпен есеп айырысуды қамтамасыз ете алатын нақты бизнеске салынбай, керісінше бұрын қосылғандарға төлем жасауға жұмсалған.

Ведомство мәліметінше, қазіргі уақытта 275 азамат жәбірленуші деп танылды, оларға келтірілген шығынның жалпы сомасы 217 миллион теңгені құрайды.

"Тергеу барысында ұйымдастырушылардың кооперативтен 94 миллион теңгені консультациялық қызметтер үшін төлем жасау желеуімен үлестес тұлғалардың, соның ішінде "Кәусар" ЖК-ның шоттарына шығарып алғаны анықталды. 2022 жылы сот даулары басталғаннан кейін Алматыда алты жаңа тұтыну кооперативі құрылған: "ShynSaulet", "Berekeli Shanyrak", "Aya-Aru", "Jasmin", "USCoop" және "Baiterek"", - деп мәлімдеді баспасөз қызметі.

ҚМА мәліметінше, жаңа ұйымдар "R.O.I." ТК басшысының бақылауында болған және олар жеке сот орындаушылары бұғаттаған негізгі кооперативтің банктік шоттарын айналып өтіп, ақша аудару үшін пайдаланылған.

"Ұйымдастырушы 2 ай мерзімге қамауға алынды. Соттың санкциясымен 3 автокөлікке, 25 пәтерге, сондай-ақ банктік шоттарға тыйым салынды", - деп хабарлады ҚМА.

Тергеу жалғасып жатыр. Ведомство өкілдері Қылмыстық-процестік кодекстің 201-бабына сәйкес өзге ақпарат жария етуге жатпайтынын атап өтті.

Еске сала кетейік, сәуірде Алматыда Boxy Wealth қаржы пирамидасын құру және оған басшылық ету дерегі бойынша тергеудің аяқталғаны белгілі болған еді. Схема қызметі www.boxywealth.com сайты және "Күнделікті табыс" чатын қоса алғанда, мессенджерлер арқылы жүзеге асырылған. Бастапқыда қатысушыларға халық тұтынатын тауарлар туралы ақпарат көрсетілген, бірақ кейіннен оларды инвестициялық платформаға тарта бастаған.

Бізді Google-дың негізгі дереккөздер тізіміне қосыңыз