Салтанат мемлекеттік би ансамбліне 70 жыл толды

Биыл «Салтанат» мемлекеттік би ансамблінің құрылғанына 70 жыл толды. Ұлттық би өнерінің бай мұрасын көздің қарашығындай сақтап, оны асқан шеберлікпен көрсетіп жүрген бірегей ұжым Almaty Theatre сахнасында мерейтойлық концерт берді. Осылайша «Ел салтанаты» тағы бір белесті қорытындылады.

Сәні асқақ «Салтанат» жетпіс жылдық белеске оңай жеткен жоқ», – дейді ұжым мүшелері. Табанды еңбек пен маңдай тердің арқасы. Қанша буын ауысса да, ұжым ұлттық биді биікке көтеріп келеді. Бұған көрермен куә. Мерейтой аясында ансамбль «Би керуені» жобасымен ел өңірлерін аралады.

Елубай Кенжалиев, «Салтанат» мемлекеттік би ансамблінің директоры:

- Ол жерде тек қана гал-концертпен ғана шектеліп қойғанымыз жоқ, өңірлердегі мына мәдениет және білім саласындағы хореографтардың барлығына тегін шеберлік сабақтарын өткіздік. Біздің 70 жылдықта жинаған үлкен тәжірибеміз бар, осы өңірлердегі өсіп келе жатқан, жаңадан келе жатқандармен тәжірибе алмасу мақсатында өткізілді.

Мерейтойлық концерт аясында би ансамблінің тарихына арналған «Шығармашылық жол» кітабы таныстырылды. Өткенді парақтасақ, 1955 жылы шаңырағы көтерілген би ұжымы алғашында Қазақ КСР-нің Мемлекеттік ән және би ансамблі деп аталды. Өте қысқа мерзім ішінде бай репертуар жасалып, 1957 жылы Мәскеуде өткен Бүкіләлемдік жастар мен студенттердің VI фестивалінде ұжым алтын медальға ие болады.

«Париж төрінде де көрермен қошеметіне бөленгеніміз есімде», – дейді ұжымның байырғы бишісі Нұрлыбек аға.

Нұрлыбек Әлдибеков, Қазақстанның еңбек сіңірген әртісі, ардагер биші:

- Біз өте керемет баға алдық. Ол жерде Байқадамовтың «Саяхат» атты үлкен композициясы болды. Аттармен көкпар тартатын қойылым, көрініс. Сонда қазақтың даласындағы көкпарды көрсеткенде олар орындарынан тік тұрып, бірнеше рет қайталауды сұрап, үлкен қошаметпен қарсы алды. Ол да бір ансамбльдің тарихының бір ғана парақшасы деп айтуға болады.

Концертте ұжым әлемдік стандартқа сай Мәдениет және ақпарат министрлігінің қолдауымен құрылған фольклорлық ансамбль сүйемелдеуімен қазақтың ұлттық билерін ұсынды. «Салтанат» би ансамблінің 70 жылдық мерейтойы 30 қарашада Астанада Қалибек Қуанышбаев атындағы Қазақ ұлттық музыкалық драма театрында жалғасады. 

Авторлары: Гүлжан Көленқызы, Айбек Ақшолақов