Салық кодексіне өзгерістер енгізіледі

Келесі жылдан бастап, қымбат мүлік пен көлігі барлар қосымша салық төлейді. Мемлекеттік кірістер комитетінің мамандары жаңа салық  туралы ақпараттық-түсіндіру жұмыстарын жүргізуде. Жаңартылған Салық кодексі 2026 жылдың бірінші қаңтарынан бастап күшіне енеді. Жаңа құжатта салық жүйесі  жеңілдетіліп, салық салудың жаңа қағидаттары енгізілді. Негізгі өзгерістер  экономика мен бизнестегі тұрақтылықты арттыруға бағытталған. Сондай-ақ салықтық әкімшілендіруді оңтайландырып, цифрлық сервистерді кеңінен қолдану қарастырылған. Семейде өткен жиын барысында мамандар салық кодексіне енетін өзгерістерді жан-жақты түсіндірді. 

Автокөліктің құны 75 миллион теңгеден асса,  ал ұшақ  немесе  кеме  бағасы 100 миллион теңгеден қымбат болса, иесі  бір реттік 10 процент акциз салығын төлейді. Бұл – салық жүйесіндегі жаңа өзгеріс, қымбат көлік құралдарына қатысты тәртіп. 

Айнұр Сартаева, Мемлекеттік кірістер комитеті қосылған құн салығын әкімшілендіру басқармасы басшысының орынбасары:

 - Сән-салтанаты деген бөлек салық болмағанымен осы салықтың сипатына келетін, акциз салығы салынады. Ол қымбат бағалы автокөлік құралдарына әуе кемелеріне теңіз кемелеріне,сонымен қатар қымбат шараптар мен сигараларға салынады.

 Жаңа кодекстегі басты өзгеріс арнайы салық режимдерінің саны жетеуден үшке  қысқарады. Өзін-өзі жұмыспен қамтығандар үшін 4% мөлшерлеме қарастырылған. Бұл режим жеке кәсіпкер ретінде тіркелмей, заңды түрде жұмыс істеуге мүмкіндік береді және артық кедергілерді  болдырмайды. 

Гүлмира Смағұлова, Мемлекеттік кірістер комитеті өндірістік емес төлемдерді әкімшілендіру басқармасының басшысы:

- Бұл – өзін-өзі жұмыспен қамтыған азаматтарға арналған арнайы режим. Яғни бұл такси жүргізушілері, курьерлер, шаштараздар, жалғыз жұмыс істейтін кәсіпкерлер. Жаңа режим қолжетімді, Оны пайдалану өте оңай

Мемлекеттік кірістер комитеті әзірлеген арнайы мобильді қосымшаны жүктеп, тұтынушыға чек беру жеткілікті. Осы арқылы адамның ресми табысы қалыптасады.

 Салық кодексі салықтық әкімшілендіруді жаппай жеңілдетуді көздейді. Атап айтқанда, салық есептілігінің көлемі 30 пайызға қысқарады, салық саны 20 пайызға азаяды, жеңілдіктер мен алымдар оңтайландырылады. Өзгерістер корпоративтік және жеке табыс салықтарынан бастап инвестицияларды ынталандыру және салық жүктемесін қайта бөлу секілді барлық негізгі бағытты қамтиды. Қосылған құн салығының жаңа базалық мөлшерлемесі 16 пайыз болып бекітілді.

Авторлары: Рүстем Қайратұлы, Мәди Базарбеков