Самарқанд төрінде түркі рухы жаңғырды

Көне Самарқан тағы да тарихтың тірі куәсіндей түркі дүниесінің рухани тынысын сездірді. ЮНЕСКО Бас конференциясының 43-сессиясы аясында Түркі мәдениеті және мұрасы қоры ұйымдастырған салтанатты іс-шарада түркі өркениетінің терең тамырын, мәңгілік мұратын және ұлтты ұлықтайтын рухын айшықтайтын бірегей жобалар көпшілікке таныстырылды, – деп хабарлайды Aikyn.kz.

Бұл жиын түркі елдерінің ортақ мәдени жадын жаңғыртып, рухани тұтастығын нығайтуға бағытталған маңызды қадам болды. Самарқан төрінде өткен бұл сәт — ғасырлар бойы қалыптасқан бауырластықтың жаңа тынысы, мәдени сабақтастықтың мерейлі көрінісі. Себебі бұл жолы әлем мәдени кеңістігінде түркі дүниесінің дауысы бұрынғыдан да айқын естілді.

Іс-шараның басты мақсаты – түркі халықтарының бай мәдени мұрасын сақтау, оны әлемдік өркениет кеңістігінде лайықты таныту және келер ұрпаққа аманаттау. Осы орайда Қор әзірлеген “Түркі әлемінің мәдени коды” атты көптілді каталог пен көптомдық “Түркі фольклорлық мұрасы” антологиясы таныстырылды. Бұл еңбектер “Түркі әлемінің келешегі – 2040” және “TURKTIME” стратегиялық құжаттарының рухына сай дайындалып, барша түркі жұртының ортақ мәдени тамырын бір арнаға тоғыстырған рухани көпірге айналды.

Жобалар Өзбекстан Президенті Шавкат Мирзиёевтің бастамасымен және түркі мемлекеттері басшыларының қолдауымен жүзеге асып, түркі өркениетінің асыл қазыналарын заманауи үлгіде жүйелеу мен ғылыми тұрғыда зерделеудің жаңа белесін ашты. Бұл – мәдениет пен руханият саласында ынтымақ пен бауырластықты тереңдетудің нақты көрінісі.

Сондай-ақ осы сессия барысында 2025 жылғы 3 қарашада қабылданған ерекше тарихи шешім – 15 желтоқсанның “Дүниежүзілік түркі тілдері күні” болып жариялануы да атап өтілді. Бұл – түркі халықтарының ортақ рухани тамырын, тіл мен мәдениет арқылы жалғасқан бірлігін әлемдік деңгейде мойындаған маңызды қадам. Бұл шешім түркі тілдерінің байлығын ғана емес, олардың адамзат өркениетіне қосқан үлесін терең бағалаудың және ортақ рухани кеңістігімізді ұлықтаудың айқын дәлелі болды.

Самарқандтағы тұсаукесерге Әзербайжан, Қазақстан, Қырғызстан, Түркия, Түрікменстан, Өзбекстан және Мажарстанның ЮНЕСКО жанындағы тұрақты өкілдері, халықаралық ұйымдар мен дипломатиялық корпус өкілдері, ғалымдар мен мәдениет қайраткерлері қатысты. Қатысушылар түркі мәдениетінің терең тамырына тағзым етіп, бүгінгі ұрпақтың осы құндылықтарды сақтауға деген жауапкершілігін ерекше атап өтті.

Кеш соңында этно-фольклорлық “TURAN” ансамблі түркі рухының мәңгілік сазын әуелетіп, тыңдарман жүрегіне жол тапты. Бұл өнер – түркі елдерінің ортақ жаны мен үнін айшықтаған көркем сәтке айналды.

Түркі мәдениеті және мұрасы қорының президенті Ақтоты Райымқұлова өз сөзінде ЮНЕСКО мен Өзбекстан Республикасына көрсеткен қолдауы мен қонақжайлылығы үшін ризашылығын білдіріп, бұл шараны «рухани сабақтастық пен бауырластықтың көрінісі» деп атап өтті.

– Біз түркі халықтарының мәдени мұрасын сақтау мен дәріптеу ісінде ұлт пен ұрпақ шекарасынан биік тұратын миссияны жалғастырамыз. Өйткені мәдениет – мәңгілік, ал сол мәдениетті біріктіретін рух – біздің ортақ тамырымыз, – деді ол.

Сараптама, зерттеу мақала, күнделікті өзекті ақпаратты «Айқынның»  TELEGRAM арнасынан табасыз.